Kɔmɔ Yemi 3 - BAIBLO ALOO NGMAMI KLƆUKLƆU Ɔ

Tue gblami, tsui tsakemi, kɛ hɛ kɛ nɔ fɔmi

¹ Ke a ke Mawu gbla nɔ ko tue ɔ, imi lɛɛ i le nɔ́ nɛ ji.

² E tsɛ̃ mi ngɔ wo diblii kpii mi, nɛ la ko la ko be lejɛ ɔ.

³ E fiaa mi ní wawɛɛ nɔtonɔto ligbi mluku ɔ tsuo.

⁴ E ha nɛ i ta he lo, nɛ ye he womi pee nyamanyama, nɛ e ku ye wuhi a mi.

⁵ Nɔ́ nami, kɛ aywilɛho sa ye yi kaa nɔ́ nɛ pe a wo mi tsu.

⁶ E ha nɛ i hi diblii kpii mi kaa nihi nɛ gbo blema a a ti nɔ ko.

⁷ E bɔ mi pã; e po piɛ kɛ wo ye he, konɛ ma ko na blɔ nɛ ma tu fo kɛ je.

⁸ I kpa ngmlaa kɛ tsɛ Mawu, konɛ e ba je mi, se e bui mi tue.

⁹ E ngɔ tɛ agbohi kɛ fɔ blɔ mi ha mi, nɛ e ha nɛ ye blɔ ɔ kpɛ̃.

¹⁰ E pee kaa osisiblisi nɛ wo ka, loo jata nɛ laa e he, konɛ e nu mi.

¹¹ E ha nɛ i tla blɔ, nɛ e tsɔtslɔɔ ye mi; e pee mi posoposo.

¹² E gbla e kɛ̃ɛ̃ ɔ mi, nɛ e ngɔ e kɛ̃ɛ̃ mi bi ɔ ngɔ ka mi.

¹³ E tsɛ̃ e kɛ̃ɛ̃ mi bi ɔmɛ kɛ ba sɛ ye wuhi a mi tɔɔ.

¹⁴ I plɛ pee muɔ nɔ́ ha nihi tsuo. Be tsuaa be ɔ, imi ji a nya mi la nɛ a ngɛ lae.

¹⁵ E ha nɛ i na amanehlu nɛ nya wa. Ye we amanehlu ɔ ngɛ kaa agba ngɛ ye nya mi.

¹⁶ E ha nɛ i kokloo si ngɛ zugba, nɛ ye lungu kli kaa nɔ nɛ kpe tɛ ngmlitsa.

¹⁷ I li nɔ́ nɛ a tsɛɛ tue mi jɔmi ɔ, jehanɛ lɛɛ ye hɛ je bua jɔmi po nɔ.

¹⁸ Lɔ ɔ he ɔ, i de ke, “Akuanyɛ! Ye he wami, kɛ ye hɛ nɛ i ngɔ kɛ fɔ Yawɛ nɔ ɔ se po.”

¹⁹ Ye we amanehlu, kɛ hi he ko nɛ be ye dɛ ɔ, ke i kai ɔ, e ngɛ kaa agba, loo duɔ nɛ nya wa ha mi.

²⁰ Be tsuaa be nɛ i ngɛ nɔ́ nɛ ɔ he susue ɔ, e haa nɛ ye he mi jɔ̃ɔ̃.

²¹ Se nɔ́ nɛ ke i kai nɛ ye nɔ gbagba tee ji,

²² kaa Yawɛ suɔmi se pui gblegbleegble; e naa mɔbɔ daa.

²³ Ní nɛ ɔmɛ peeɔ ehe daa mɔtu. Yawɛ we anɔkuale yemi ɔ kle.

²⁴ Yawɛ ji ye nɔ́ tsuaa nɔ́; lɔ ɔ he ɔ, i ngɔ ye hɛ kɛ fɔ e nɔ.

²⁵ Yawɛ mi mi hi ha nihi tsuo nɛ ngɔɔ a hɛ kɛ fɔɔ e nɔ ɔ, nɔ tsuaa nɔ nɛ hlaa Yawɛ se blɔ ɔ; e peeɔ lɛ kpakpa.

²⁶ Lɔ ɔ he ɔ, e sa kaa waa to wa tsui si kɛ hyɛ Yawɛ blɔ, konɛ e he wa yi wami.

²⁷ Wa nihe mi ji be nɛ sa kaa waa kase tsui si tomi nɛ ɔ.

²⁸ Ke wa ngɛ amanehlu nae ɔ, e sa kaa waa pee dii, nɛ waa to wa tsui si.

²⁹ Waa ba wa he si, ejakaa ke wa pee ja a, e be yaka pee.

³⁰ Ke a ngɛ wɔ ní fiae, loo a ngɛ wa hɛ mi si puee ɔ, wa ha nɛ a pee kɛkɛ.

³¹ Nyɔmtsɛ ɔ be wɔ kuae kɛ ya neneene.

³² Eko ɔ, e ma ha nɛ wa maa ye aywilɛho lɛɛ, se kɛ̃, e maa na wɔ mɔbɔ, ejakaa e suɔmi ɔ kle, nɛ e ngɛ daa.

³³ E pee we lɛ bua jɔmi kaa e ma ha nɛ waa ye aywilɛho, loo waa na amanehlu.

³⁴ Ke a wo wɔ tsu, nɛ wa mumi nya ngɛ tae ɔ, Nyɔmtsɛ ɔ le.

³⁵ Blɔ nya nɛ Hiɔwe No ɔ ha wɔ ɔ, ke a he ngɛ wa dɛ ɔ, e le.

³⁶ Ke a yi dami sane ngɛ sane yemi he ɔ, Nyɔmtsɛ ɔ le.

³⁷ Ke pi Nyɔmtsɛ ɔ he wami nya a, mɛnɔ ma nyɛ ma de nɔ́ ko nɛ e ba mi?

³⁸ Kpakpa jio, yaya jio, Hiɔwe No ɔ lɛ deɔ loko e baa mi.

³⁹ Nimli adesahi kɛkɛ ji wɔ. Ke wa pee yayami nɛ a gbla wa tue ɔ, mɛni he je wa hii wa nya jee ɔ?

⁴⁰ Nyɛ ha nɛ waa hyɛ wa je mi bami mi saminya, nɛ waa kpale kɛ ba Yawɛ ngɔ.

⁴¹ Nyɛ ha nɛ wa wo wa nine nɔ nɛ waa fa kue kɛ je wa tsui mi tɔɔ kɛ ha Mawu nɛ ngɛ hiɔwe ɔ ke,

⁴² “Wa tɔ̃; wa tsɔ atuã, lɔ ɔ he nɛ mo Yawɛ, o kɛ wa yayami ɔmɛ pɛ wɔ ɔ nɛ.

⁴³ “O kɛ abofu nɛ nya wa nyɛɛ wa se, nɛ o ba gbe wɔ; o nɛ wɔ mɔbɔ kulaa.

⁴⁴ O we abofu nɛ nya wa nɛ ɔ ngɛ kaa bɔku nɛ mi ti nɛ o kɛ ha o he. Enɛ ɔ he ɔ, ke wa fa kue ha mo ɔ, e sui o ngɔ.

⁴⁵ O ha nɛ wa plɛ nɔ́ nɛ a hiee, kɛ dwɔmi ha je ma amɛ tsuo.

⁴⁶ “Wa he nyɛli ɔmɛ tsuo ngɛ munyu tue kɛ ngɛ wɔ sie.

⁴⁷ Wa hao, nɛ wa nu sawale. Wa na amanehlu, nɛ a kpata wa hɛ mi.

⁴⁸ Vo nyu ngɛ ye hɛngmɛ mi jee kɛ ngɛ si puee kaa pa nɛ hia kɛ bee; ejakaa a kpata ye ma a hɛ mi.

⁴⁹ “Ma fo ya, nɛ ye vo nyu ɔ se be poe gblegbleegble;

⁵⁰ ma pee jã kɛ yaa si Yawɛ nitsɛ maa na kɛ je hiɔwe.

⁵¹ Ke i hyɛ nɔ́ nɛ ba yihewi ɔmɛ a nɔ ngɛ ma a mi ɔ, i haoɔ wawɛɛ.

⁵² “Ye he nyɛli nɛ nyɛɛ mi yaka a tsɔ mi klama, nɛ i du.

⁵³ A sake mi ngɔ fɔ muɔ mi hɛ ngmengmle, nɛ a ngɔ tɛ kɛ tsi ye yi.

⁵⁴ I ho nyu sisi ya, nɛ i de ke, ‘Ye yi ta pɛ!’

⁵⁵ “I fa kue ha mo, Yawɛ kɛ je muɔ ɔ sisi tɔɔ.

⁵⁶ Kue nɛ i fa nɛ o nu ji, ‘I kpa mo pɛɛ nɛ o ba piɛ ye he; koo tsi o tue.’

⁵⁷ Benɛ i tsɛ mo ɔ, o he nɔ, nɛ o de mi ke ma ko ye gbeye.

⁵⁸ “Nyɔmtsɛ, mo lɛ o je ngmlaa ha mi. Mo lɛ o he ye yi wami.

⁵⁹ Yawɛ, moo ye ye sane ɔ ha mi; yayami tsuo nɛ a pee mi ɔ, o le.

⁶⁰ O le bɔ nɛ ye he nyɛli ɔmɛ sume ye sane ha. O le bɔ nɛ a so ye yi nɔ.

⁶¹ “Yawɛ, ahlua nɛ a bɔ mi ɔ, o nu. Yi mi yaya tsuo nɛ a to kɛ wo ye he ɔ, o le.

⁶² Be tsuaa be ɔ, ye he munyu yaya sɔuu a ngɛ tue. Jã kɛ̃ a ngɛ a ga yaya amɛ toe.

⁶³ Hyɛ! A ngɛ sihi he jio, a ngɛ si dami nya jio, ye he fɛu sɔuu a ngɛ yee; a ngɔ mi ngɔ pee a nya mi la.

⁶⁴ “Yawɛ lee, gbla a tue ngɛ níhi nɛ a pee ɔ a he.

⁶⁵ Moo gbiɛ mɛ, nɛ o ha a tsui nɛ ye mɛ

⁶⁶ Yawɛ lee, o kɛ mi mi la nɛ nyɛɛ a se gidigidi, nɛ o kpata a hɛ mi pɛsɛpɛsɛ ngɛ je ɔ mi!”