Kɔmɔ Yemi 2 - BAIBLO ALOO NGMAMI KLƆUKLƆU Ɔ

Yawɛ gbla Yerusalem tue

¹ Benɛ Nyɔmtsɛ ɔ mi mi wo la a, e ha nɛ bɔku ha Zion nɔ. E kpɔ́ Israel he fɛu ɔ kɛ je hiɔwe kɛ ba pue zugba. Ligbi ɔ nɛ e mi mi fu ɔ, e kua lɛ nitsɛ e we pohu.

² Nyɔmtsɛ ɔ kpata Israel ma amɛ tsuo a hɛ mi nɛ e nɛ mɔbɔ kulaa. E ngɔ e mi mi la a kɛ ywia Yuda ma a nya mɔ ngua amɛ tsuo ngɔ pue si. E ha zo gbe nɔ yemi ɔ, kɛ e mi matsɛmɛ ɔmɛ.

³ Benɛ wa he nyɛli ɔmɛ ba tua wɔ ɔ, e piɛ we wa he, mohu ɔ, e kɛ hɛdɔ nɛ nya wa ku Israel he wami kpetekpleenyɛ ɔ nya la. E gli kɛ wo wɔ kaa la nɛ ngɛ tsoe plamplam kɛ ngɛ nɔ́ tsuaa nɔ́ hɛ mi kpatae.

⁴ E ngɔ e kɛ̃ɛ̃ mi bi ɔmɛ ngɔ ka wɔ kaa wa he nyɛlɔ. E gbe wa suɔli kpakpa amɛ tsuo. E kɛ e mi mi la nɛ nya wa kaa la a kple Yerusalem nɔ.

⁵ Nyɔmtsɛ ɔ kpata Israel hɛ mi kaa nɔ́ nɛ e he nyɛlɔ ji lɛ. E ywia e mɔ ɔmɛ, kɛ matsɛ we ɔmɛ ngɔ pue si. E ha nɛ Yuda ma a ngɛ kɔmɔ yee babauu.

⁶ Mawu we ɔ, he nɛ wa jaa lɛ ngɛ ɔ, e ywia lɛ dukuduku ngɔ pue si. E gu nyami be ɔmɛ, kɛ Hejɔɔmi ligbi ɔ. Abofu nɛ nya wa nɛ ɔ sa matsɛmɛ, kɛ osɔfohi tsuo a he.

⁷ Nyɔmtsɛ ɔ sume e bɔ sami la tɛ ɔ hu, nɛ e kua sɔlemi we ɔ. E ha he nyɛli ku mɔ ɔmɛ kɛ pue si. A hwɔ lele ngɛ Yawɛ we ɔ mi kaa bɔ nɛ wa peeɔ ke wa ngɛ nyami ligbi yee ɔ.

⁸ Yawɛ to e yi mi kaa a ku Zion gbogbo ɔmɛ ngɔ pue si. E susu a kami kɛ blimi kɛ to, bɔ nɛ pee nɛ a kpata nɔ́ tsuaa nɔ́ hɛ mi pɛsɛpɛsɛ. Amlɔ nɛ ɔ, mɔ ɔmɛ, kɛ gbogbo ɔmɛ tsuo ku kɛ pueɔ si.

⁹ Zu ha agbo ɔmɛ a nɔ; a ku a se lami ní ɔmɛ a mi dukuduku. A nuu matsɛmɛ ɔmɛ, kɛ ganɔ ɔmɛ kɛ ho ma se ya. Nɔ ko tsɔɔ we mlaa a hu. Yawɛ je we nina kɛ ha we gbali ɔmɛ hu.

¹⁰ Yerusalem nimeli ɔmɛ hii si dii ngɛ zugba. A ngɔ bunyuku ngɔ pue a yi mi, nɛ a ha kpekpe ya bo kɛ tsɔɔ kaa a pia a he. Yihewi ɔmɛ ngɔ a hɛ mi kɛ bu si.

¹¹ I fo ya hluu, nɛ ye hɛngmɛ tsuo fuu. I ngɛ he hiami mi wawɛɛ. Ye tsui ngɛ mi yee, ejakaa a ywia ye we bi ɔmɛ a ma a. Jokuɛwi kɛ bimwɔwi ngɛ hɛlie ngɛ gbɛjegbɛ ɔmɛ a nɔ ngɛ ma a mi.

¹² Benɛ a ngɛ awe nyae, nɛ a ngɛ a nyɛmɛ bie ke, “Jije wa ma na abolo ngɛ; jije wa ma na wai ngɛ ɔ” ɔ, a hɛliɔ kaa nihi nɛ plaa ngɛ ma a mi gbɛjegbɛ ɔmɛ a nɔ; nɛ a gboɔ ngɛ a nyɛmɛ a gugue mi.

¹³ Yerusalem, i suɔ mo! Yerusalem, mɛni ma de ha mo? Kɛ ma pee kɛ jɔɔ o bua kɛɛ? Nɔ ko nɔ ko nɛ́ amanehlu hyɛ kaa nɔ́ nɛ ba o nɔ nɛ ɔ. O haomi ɔ kle tsɔ, nɛ e nyagbe be. Mɛnɔ ma he o yi wami?

¹⁴ O gbali ɔmɛ be nɔ́ kpakpa ko nɛ a ma de mo; lakpa pɛ a yeɔ mo. A fiɛɔ kɛ sisiɔ mo. A je we o tɔmi kpo kɛ tsɔɔ mo. A ha nɛ o susu kaa e hia we nɛ o tsake o tsui.

¹⁵ Nihi tsuo nɛ ba guu ma a nya kɛ bee ɔ, hwɔɔ o yi; a huanyaa a yi, nɛ a yeɔ o he fɛu. A deɔ ke, “Jamɛ a ma kɛ e he fɛu ɔ ji nɛ ɔ? Je ɔ tsuo fiami nɔ́ ɔ ji nɛ ɔ lo?”

¹⁶ O he nyɛli ɔmɛ tsuo ngɛ munyu tue kɛ ngɛ mo sie; a kɛ ninyɛ hyɛɛ mo gãã. A kpɔɔ nya kɛ woɔ mo. A deɔ ke, “E tsɔɔ mo! Mwɔnɛ ji mwɔnɛ! Wa nine su o nɔ jehanɛ!”

¹⁷ Nɔ́ ko nɛ Yawɛ de ke e maa pee ɔ, amlɔ nɛ ɔ, e pee. Yawɛ kpata wa hɛ mi pɛsɛpɛsɛ kaa bɔ nɛ e de to be ko ke e maa pee ɔ. E ha nɛ wa he nyɛli ɔmɛ ye wa nɔ, nɛ a bua jɔ a he kaa wa hɛ mi kpata.

¹⁸ Yerusalem lee, moo fa kue boboobo nɛ o tsɛ Nyɔmtsɛ ɔ! Ha nɛ o vo nyu ɔmɛ nɛ a hi bee kaa pa nyɔ kɛ pia. Koo jɔɔ ya fomi, nɛ ko kpa kɔmɔ yemi hulɔ.

¹⁹ Tee si nɛ o nya awe nyɔnyɔɔnyɔ ha Nyɔmtsɛ ɔ. Moo fa kue ha lɛ kɛ o tsui tsuo, nɛ o kpa lɛ pɛɛ nɛ e na o bimɛ ɔmɛ mɔbɔ. Hyɛ kaa hwɔ ngɛ jokuɛwi gbee ngɛ gbɛjegbɛ ɔmɛ tsuo a nɔ ngɛ he tsuaa he.

²⁰ Yawɛ lee, hyɛ koo! Moo hyɛ nihi nɛ o ngɛ mɛ yi mi wae ɔ! Yihi ngɛ mɛ nitsɛmɛ a muklii mi bimɛ nɛ a suɔ ɔ yee! Mawu we ɔ nitsɛnitsɛ mi po a ngɛ osɔfohi, kɛ gbalihi gbee!

²¹ Jokuɛwi kɛ nikɔtɔmahi tsuo gbo kɛ pueɔ si ngɛ gbɛjegbɛ ɔmɛ a nɔ. He nyɛli ɔmɛ kɛ klaate gbe nihewi, kɛ yihewi. Ligbi ɔ nɛ o mi mi wo la a, o gbe mɛ tsuo basabasa nɛ o nɛ́ mɔbɔ kulaa.

²² O kpee ye he nyɛli ɔmɛ kɛ ba nɛ a ba bɔle mi kaa nɔ́ nɛ a ngɛ nyami ligbi yee. Ligbi ɔ nɛ o mi mi wo la a, nɔ ko nɔ ko nyɛ we nɛ e ye e he. Ye bimɛ nɛ i lɛ, nɛ i suɔ mɛ ɔ, he nyɛli ɔmɛ gbe mɛ tsuo.