Kɔmɔ Yemi 1 - BAIBLO ALOO NGMAMI KLƆUKLƆU Ɔ

A ye Yerusalem he kɔmɔ

¹ Yerusalem, ma nɛ sa be ko ɔ, nihi babauu ngɛ mi ɔ, hyɛ bɔ nɛ e mi je gu kɛ fɔɔ si ha! Be ko nɛ be ɔ, je ma amɛ buu lɛ ma nguaa, se jehanɛ lɛɛ e ngɛ kaa yalɔyo. Ma nɛ ngɛ kaa matsɛ biyo ngɛ je ma amɛ tsuo a kpɛti ɔ ba plɛ pee je ma amɛ a nyɔguɛ.

² Ya sɔuu e ngɛ foe nyɔnyɔɔnyɔ tsuo; nɛ vo nyu ngɛ e hɛngmɛ mi jee kɛ ngɛ si kplee. E suɔli ɔmɛ hu a ti nɔ ko nɔ ko be nɛ maa jɔɔ e bua. E huɛmɛ ɔmɛ tsuo kpa ngɛ e se, nɛ a ba pee e he nyɛli.

³ Yuda bi ɔmɛ ba plɛ pee nyɔguɛhi; pi a suɔmi nya nɛ a ngɔ mɛ kɛ ho ma se ya a. A ya je zugba kpahi a nɔ, nɛ a he mi jɔɛ mɛ. Benɛ a ngɛ aywilɛho yee ɔ, a he nyɛli ɔmɛ tsuo ba sa a yi.

⁴ Zion blɔ ɔ nɔ pee mɔbɔmɔbɔ. Nimli a nane po ngɛ blɔ ɔ nɔ; a bɛ nɛ a ba ye nyami be ɔmɛ. Nɔ ko nɔ ko ba gui ma a agbo ɔmɛ a mi. Osɔfo ɔmɛ ngɛ kɛmɛe. Yihewi ɔmɛ ngɛ nɔ́ nae. Zion hao wawɛɛ nitsɛ.

⁵ E he nyɛli ɔmɛ ye kunimi; a nine su e nɔ jehanɛ. Yawɛ lɛ ha nɛ e ngɛ nɔ́ nae ngɛ yayami babauu nɛ e pee ɔ he. E he nyɛli ɔmɛ nuu e bimɛ ɔmɛ nyɔguɛ kɛ ho.

⁶ Yerusalem he fɛu ɔ pee kaa blema nɔ́ ko nɛ be kɛkɛ. E ma nimeli ɔmɛ ngɛ kaa batslɔɔhi nɛ hwɔ ngɛ mɛ yee, nɛ a pee wudɔwudɔ kɛ ngɛ fo tue ngɛ de dali a nya.

⁷ Benɛ Yerusalem ngɛ nɔ́ nae wawɛɛ ngɛ ma se ɔ, e kai e blema si himi, kɛ ní kpakpahi tsuo nɛ e ná a. Benɛ he nyɛli ɔmɛ a nine su e nɔ ɔ, nɔ ko nɔ ko ba ji ngmlaa ha lɛ. He nyɛli ɔmɛ ye e he fɛu, nɛ a bɔ lɛ ahlua ngɛ si nɛ e nɔ ɔ he.

⁸ Yerusalem pee yayami wawɛɛ kɛ pue e hɛ mi si. E pee kaa nɔ ko nɛ hɛɛ e he gu; nihi tsuo nɛ peeɔ e he akɔtaa a bui lɛ hu. Ee, e ngɛ kɛmɛe, nɛ e ngɛ e hɛ mi laae.

⁹ Yerusalem he yayami ɔ ngɛ fu jee gbɛɛ; se lɛ nitsɛ lɛɛ nɔ́ nɛ ma e nɔ ɔ pee we lɛ kɔmɔ ko kulaa. E si nɔmi ɔ nya wa; nɔ ko nɔ ko be nɛ maa wo lɛ bua. E jé ngmlaa ke, “Ao! Yawɛ, moo hyɛ nɛ o na mi mɔbɔ, ejakaa ye he nyɛli ɔmɛ ye kunimi!”

¹⁰ E he nyɛli ɔmɛ kpɔ e june ní tsuo ngɛ e dɛ. E ngɛ he nyɛli ɔmɛ hyɛe kikɛ nɛ ɔ nɛ a bu kɛ sɛ sɔlemi we ɔ mi nitsɛnitsɛ. He nɛ mlaa ngmɛ́ ma je li blɔ nɛ a ya a po, a sɛ lejɛ ɔ.

¹¹ E we bi ɔmɛ ngɛ kɛmɛe kɛ ngɛ nɔ́ ko hlae nɛ a ye. A ngɔ a juetli ɔmɛ kɛ tsake niye ní, konɛ a yi nɛ na wami. Ma a ngɛ kue fae ke, “Yawɛ, moo hyɛ nɛ o na mi mɔbɔ, ejakaa ye he guɛ gbo!”

¹² Kɔmɔ nɛ ma a ngɛ yee kɛ ngmlaa boboobo kɛ ngɛ nihi nɛ bee ɔ tsɔɔe ji, “Nyɛ nihi tsuo nɛ nyɛ bee, anɛ nɔ́ nɛ ɔ pee we nyɛ mɔbɔ lo? Nyɛɛ hyɛ mi ha kaa nɔ ko ye aywilɛho hyɛ kaa ye nɔ́ nɛ ɔ lo? Benɛ Yawɛ mi mi fu wawɛɛ ɔ, nɛ e ngɔ kikɛmɛ a haomi nɛ ɔ kɛ ba ye nɔ.”

¹³ “Yawɛ ha la je hiɔwe ba sɛ ye wuhi a mi. E tsɔ mi klama, nɛ e ha i nɔ si; kɛkɛ nɛ e kua mi, nɛ i ngɛ aywilɛho yee daa.

¹⁴ “E ngɔ ye he yayami ɔmɛ tsuo kɛ to, nɛ e fi kaa tlomi; kɛkɛ nɛ e ngɔ tloo mi. E jiɔ tsɔ ha mi; e ngɛ mi gbee! Nyɔmtsɛ ɔ ngɔ mi kɛ wo he nyɛli nɛ a he wa pe mi a dɛ mi, nɛ peepee ko kulaa be ye he.

¹⁵ “Nyɔmtsɛ ɔ kua ye ta buli katsɛmɛ ɔmɛ. E tsɔ tabo ko kɛ ba nɛ a ba kpata ye nihewi ɔmɛ a hɛ mi. Nyɔmtsɛ ɔ naa Yuda nɛ ngɛ kaa yomiyo ɔ nɔ kaa a ngaa wai ngɛ wai muɔ mi.

¹⁶ “Enɛ ɔ he i wo yana, nɛ vo nyu ngɛ ye hɛngmɛ mi jee kɛ ngɛ si puee. I be bua wolɔ ko nɛ maa wo mi he wami. Peepee ta ye bimɛ ɔmɛ a he, ejakaa he nyɛlɔ ɔ ye ye nɔ kunimi.

¹⁷ “Imi Zion, i wo ye nine nɔ, konɛ a ye bua mi, se balɔ ko ba ji ngmlaa ha mi. Yawɛ ha nɛ mahi nɛ bɔle imi Yakob, ba pee ye he nyɛli. Yerusalem ba pee nɔ́ nɛ a hiee.

¹⁸ “Yawɛ nɔ́ da. Ejakaa imi lɛ i tsɔ atuã, nɛ i bui e munyu ɔ; se kɛ̃ ɔ, nyɛ nihi tsuo nyɛɛ bu mi tue, konɛ amanehlu nɛ ba ye nɔ nɛ ɔ, nyɛɛ na. A nuu ye nihewi ɔmɛ, kɛ yihewi ɔmɛ nyɔguɛ kɛ ho.

¹⁹ “I fɔ ye huɛmɛ ɔmɛ nine, konɛ a ba piɛ ye he, se a sisi mi. Benɛ ye osɔfo ɔmɛ, kɛ ma nimeli ɔmɛ tsuo ho ma a mi ya ya ngɛ niye ní hlae nɛ a ye nɛ a yi nɛ na wami ɔ, kɛkɛ nɛ mɛ tsuo a hɛ mi kpata.

²⁰ “Yawɛ lee, hyɛ bɔ nɛ i ngɛ haoe ha; i ngɛ he hiami mi wawɛɛ, nɛ ye tsui ngɛ mi yee. I tsɔ o hɛ mi atuã. A ngɛ nihi gbee ngɛ gbɛjegbɛ ɔmɛ a nɔ; jã kɛ̃ nihi ngɛ gboe ngɛ we ɔmɛ a mi hulɔ.

²¹ “Bu ye kɛmɛmi ɔ tue; nɔ ko be nɛ maa jɔɔ ye bua. Haomi nɛ ba ye nɔ nɛ ɔ, ye he nyɛli ɔmɛ tsuo nu he, nɛ a bua jɔ kaa o ha sane nɛ ɔ ba ye nɔ. Ligbi nɛ o to ha he nyɛli ɔmɛ ɔ, ha nɛ e ba esɔ, konɛ mɛ hu a pee kaa bɔ nɛ i ngɛ nɛ ɔ.

²² “Yayami tsuo nɛ a pee ɔ, hyɛ nɛ o kɛ mɛ nɛ to ní ngɛ he kaa bɔ nɛ o pee imi hu ngɛ ye yayami ɔmɛ tsuo a he ɔ. Ye kɛmɛmi ɔ nya ba wa tsɔ, nɛ ye he wami ta.”