Lahi 8 - BAIBLO ALOO NGMAMI KLƆUKLƆU Ɔ

¹ I ná nɛ ye nyɛminyumu ji mo. I ná nɛ maa lɛ ha mo nyɔ. Jinɛ ke i kɛ mo kpe ngɛ ma nɔ ɔ, i ko fiɔ o nya he faa, nɛ nɔ ko be nɔ́ ko dee.

² Jinɛ i ko ngɔ mo kɛ ya maa we ɔ mi, konɛ o ya je suɔmi kpo kɛ tsɔɔ mi ngɛ lejɛ ɔ. I ko ha mo wai nɛ a futu mi; ye tso yiblii nɛ ngɔɔ ɔ wai nɛ o nu.

³ I ná nɛ ye yi fɔɔ si ngɛ o muɔ kɔni nɔ, nɛ o ngɔ o hiɔ nine kɛ fua mi.

⁴ Yerusalem yihi, nyɛɛ wo mi si kaa nyɛ be ye suɔlɔ ɔ tsɛe kɛ yaa si be nɛ lɛ nitsɛ e maa te si.

La ekpane Yi ɔmɛ

⁵ Mɛnɔ nɛ je nga kplanaa a nɔ kɛ ma, nɛ e kɛ e nine la e suɔlɔ mi kikɛ nɛ ɔ? Imi nɛ i ba tsɛ̃ɛ̃ mo ngɛ tso nɛ yiblii ngɔɔ saminya a sisi, he nɛ o nyɛ nu kɔɔmi nɛ e fɔ mo ngɛ ɔ.

Yo ɔ

⁶ Koo suɔ nɔ ko nɔ ko, ja imi pɛ; koo la yo ko yo ko nine mi, ja imi pɛ. Suɔmi ngɛ he wami kaa gbenɔ; akɔnɔ hu nya wa kaa gbeje. E mleɔ kaa la, nɛ e tsoɔ gegeege.

⁷ Nyu babauu be nyɛe maa gbe suɔmi; pa nɛ hyi be nyɛe maa ha e nɔ. Ke nɔ ko ka kaa e kɛ e weto ní tsuo ma he suɔmi ɔ, muɔ nɛ a maa muɔ lɛ.

Yo ɔ nyɛminyumu ɔmɛ

⁸ Wa ngɛ nyɛmi yoyo ko; e tui nyɔ lolo. Ligbi nɛ nyumu ko ma ba bi e si ɔ, mɛni wa maa pee ha lɛ?

⁹ Gbogbo ji lɛ jinɛ waa kɛ sika hiɔ maa ma mɔ ngɔ fɔ e nɔ. Agbo ji lɛ jinɛ wa maa ngɔ seda tso kɛ tsi e he kɛ kpe.

Yo ɔ

¹⁰ Gbogbo ji mi, ye nyɔ ɔmɛ ji mɔhi ngɛ gbogbo ɔ nɔ. Ye suɔlɔ ɔ le kaa ye bua jɔɔ ye he, nɛ ye tue mi jɔɔ mi ngɛ e ngɔ.

Nyumu ɔ

¹¹ Salomo ngɛ wai abɔɔ ko ngɛ he ko nɛ a tsɛɛ ke Baal Hamon. E ngɔ kɛ ha ni komɛ apaa yemi. Ke a kpa ní ɔ, a ti nɔ tsuaa nɔ ma ba ha lɛ sika hiɔ yi akpe.

¹² Se imi nitsɛ ye wai abɔɔ ɔ lɛɛ ke a kpa ní ɔ, mo Salomo, o ma na sika hiɔ yi akpe, nɛ apaatsɛmɛ ɔmɛ ma na lafa enyɔɔnyɔ.

¹³ Ye suɔlɔ, ha nɛ ma nu o gbi ngɛ abɔɔ ɔ mi koo! Ye huɛmɛ ɔmɛ ngɛ mo tue bue!

Yo ɔ

¹⁴ Ye suɔlɔ, ba ye ngɔ esɔ; tuu kaa batslɔɔ kɛ ba ye ngɔ; tuu kɛ ba kaa odabɔ niheyo tuɔ ngɛ yo ɔmɛ a nɔ he nɛ tsopa kɛ e he via tsohi ngɛ ɔ.