Lahi 7 - BAIBLO ALOO NGMAMI KLƆUKLƆU Ɔ

Nyumu ɔ

¹ Matsɛbiyo, hyɛ bɔ nɛ o nane ngɛ fɛu ngɛ tokota mi ha! Bɔ nɛ o fiɔhi kpe ngɛ o mlɛ mi ɔ ngɛ fɛu kaa nɔ́ ko nɛ galɔ kpanaa ko je blɔ pee.

² O langmɔ ngɛ kaa likɔkɔ kokloo nɛ wai nɛ a futu mi tɛ̃ mi gblegbleegble. O mi mi ngɛ kaa ngma nɛ a bua nya nɛ a to nga nɔ mɔmɔ kɛ bɔle lɛ.

³ O nyɔ ɔmɛ ngɛ kaa odabɔ enyɔ, aloo batslɔɔ hawi.

⁴ O kuɛ da si kaa mɔ nɛ a ngɔ suɔ wu kɛ ma. O hɛngmɛhi ngɛ kaa takuhi ngɛ Batrabim agbo ɔ nya ngɛ Heshbon ma a mi. O gugwɔ ngɛ kaa Lebanon mɔ gojoo ɔ nɛ e yi je kpo ngɛ Damasko ma a nɔ ɔ.

⁵ O yi maa si ngɛ o kuɛ nɔ kaa Karmel yo ɔ. O yi nɛ a gbɔ ɔ ngɛ kpɛe kaa bo nɛ hɛɛ alamua tu su; e peeɔ matsɛ po akɔnɔ.

⁶ Ye weyo nɛ i suɔ, o he ngɛ fɛu saminya; o he ngɛ akɔnɔ kaa nɔ́ ko.

⁷ O nɔmlɔ tso da si tsa kaa tã, nɛ o nyɔhi ngɛ kaa tã he ywie sau.

⁸ I ke ma kuɔ tã a nɛ ma ya pɛtɛ e kuɔmi ɔmɛ a he. Ha nɛ o nyɔ ɔmɛ nɛ pee kaa wai yiblii sauhi, nɛ o gugwɔ mi nɛ je via kaa tso yiblii nɛ ngɔɔ.

⁹ Ke a fiɔ o nya he ɔ, é ngɔ kaa wai kpakpa. Ke e ngɛ ja a, lɛɛ ha nɛ wai ɔ ya su ye suɔlɔ ɔ, nɛ e nu bɔ nɛ e ma nyɛ.

Yo ɔ

¹⁰ Ye suɔlɔ ɔ nɔ́ ji mi; e ngɛ ye se blɔ hlae.

¹¹ Ye suɔlɔ nɛ i suɔ mo, ha nɛ waa ho nga a nɔ ya nɛ wa ya hi kɔpe ɔmɛ a mi.

¹² Ha nɛ waa te si mɔtu mla kɛ ya hyɛ kaa wai tso ɔmɛ bɔni ba tsɛ̃mi, nɛ a gba mɔmɔ lo. Wa maa hyɛ kaa tso ɔmɛ nɛ a yiblii ngɔɔ hu gba mɔmɔ lo. Lejɛ ɔ, ma tsɔɔ mo ngɛ kaa i suɔ mo saminya.

¹³ O maa nu wai tso yiblii he via ngɛ lejɛ ɔ. Tso yiblii kpakpa amɛ tsuo pueɔ si ngɛ wa sinya a nya: tso yiblii ehehi, kɛ momohi. Ye suɔlɔ, níhi nɛ a bua nya kɛ to mo ji nɛ ɔmɛ nɛ.