Lahi 6 - BAIBLO ALOO NGMAMI KLƆUKLƆU Ɔ

Yi ɔmɛ

¹ Mo nɛ o he ngɛ fɛu pe yihi tsuo, jije o suɔlɔ ɔ ho? Tsɔɔ wɔ he nɛ o suɔlɔ ɔ gu, konɛ waa piɛ o he kɛ hla lɛ.

Yo ɔ

² Ye suɔlɔ ɔ ho e abɔɔ ɔ mi ya; lejɛ ɔ nɛ tsopa kɛ e he via tso ɔmɛ ngɛ. E ngɛ e to ɔmɛ hyɛe ngɛ lejɛ ɔ, nɛ e ngɛ nga mi mɔmɔhi a nya buae.

³ I ngɔ ye he kɛ ha ye suɔlɔ ɔ, nɛ lɛ hu e ngɔ e he kɛ ha mi. E hyɛɔ e to ɔmɛ ngɛ nga nɔ mɔmɔ ɔmɛ a mi ngɛ lejɛ ɔ.

La enuɔne Nyumu ɔ

⁴ Ye suɔlɔ, o he ngɛ fɛu kaa Yerusalem; o he ngɛ akɔnɔ kaa Tirza ma a. O nu ye tsui kaa nɔ́ nɛ aflaangaa ngɛ tabo yi.

⁵ Koo hyɛ ye hɛ mi; o hɛngmɛhi ha ye he mi po. O yi bwɔmi ngɛ doe ngɛ o yi nɔ kaa to akpakpo kuu nɛ a ngɛ tuue ngɛ Gilead yoku ɔmɛ a nɔ.

⁶ O lunguhi hiɔ kaa jijɔhi nɛ a sã a he bwɔmi, nɛ a du a he ha mɛ kɛ we. O lungu ɔmɛ a yibɔ su; a kpe sioo ngɛ o nya mi.

⁷ O tsitsa ngɛ tsɛ̃e ngɛ o hɛ mi hami nɔ́ ɔ se.

⁸ Imi matsɛ ɔ, i ngɛ yihi nyingmi ekpa, plãhi nyingmi kpaanyɔ, kɛ yihewi nɛ a li a yibɔ!

⁹ Se nɔ kake pɛ i suɔ ngɛ a kpɛti; e he ngɛ akɔnɔ kaa lahuɛ. E nyɛ biyo nɛ e suɔ e sane saminya ji lɛ. Sé ko kulaa be e he. Yihi tsuo a bua jɔɔ e he, nɛ a jeɔ e yi. Manyɛmɛ ɔmɛ, kɛ plã amɛ tsuo jeɔ e yi.

¹⁰ Mɛnɔ nɛ ma hleii kikɛ nɛ ɔ kaa mɔtu pu nɛ gbaa? E ngɛ fɛu kaa nyɔhiɔ, nɛ e ngɛ kpɛe kaa pu. E nu ye tsui kaa nɔ́ nɛ aflaangaa ngɛ tabo yi.

¹¹ I ba ngmɛ́ tso abɔɔ ɔ mi, konɛ ma ba hyɛ tso ɔmɛ ngɛ kɔ̃ ɔ mi kaa wai tso ɔmɛ tsɛ̃ ba, nɛ tso ɔmɛ nɛ a yiblii ngɔɔ hu gba mɔmɔ lo.

¹² Benɛ ma hɛli si ɔ, e pee kaa nɔ nɛ i hii si ngɛ zugba lɛ mi ngɛ ye matsɛ ɔ kasa nya.

Yi ɔmɛ

¹³ Shulam yo, doo koo; doo nɛ o po o he nɛ waa hyɛ mo. Mɛni he je nyɛ suɔ nɛ nyɛ maa hyɛ mi nɛ i ngɛ doe ngɛ kuu enyɔ nɛ a to slɛnɛɛ ngɛ hiɛ kɛ hiɛ a kpɛti ɔ?