Lahi 5 - BAIBLO ALOO NGMAMI KLƆUKLƆU Ɔ

Nyumu ɔ

¹ Ye nyɛmiyo; ye we ayɛflo nɛ i suɔ mo saminya, i ba ye we abɔɔ ɔ mi. I ngɛ ye tsopa kɛ e he via, kɛ mimɛ nya buae. I ngɛ ye hwo kɛ hwo gbaku yee. I ngɛ ye wai kɛ nyɔ nyu nue. Huɛmɛ, nyɛɛ ye ní nɛ nyɛɛ nu ní. Nyɛ suɔmi ɔ nɛ de nyɛ kaa dã!

Yi ɔmɛ La eywiɛne Yo ɔ

² I hwɔ mahe, se i hwɔ we mahe kɛ ye tue. Tlukaa a, ye suɔlɔ ɔ ba si sinya a. Agoo, ye tsui kpa, bli sinya a ha mi. Ye nyɛmiyo, ye lahuɛ! Bɔ́ nɛɛ mi, nɛ ye yi, kɛ ye yi bwɔmi tsuo pɔ.

Nyumu ɔ Yo ɔ

³ I jé ye tade momo. Mɛni he je ma kpale wo tade? I fɔ ye nane he. Mɛni he je ma wo ye nane he mu ekohu?

⁴ Ye suɔlɔ ɔ kɛ e nine pɛtɛ sinya a he, kɛkɛ nɛ nɔ́ ko pee mi ngɛ ye tsui mi kaa nɔ́ nɛ e su ye he haa.

⁵ I te si, konɛ ma bli sinya a ha ye suɔlɔ ɔ. I kpa ye kɔni ɔmɛ a he mimɛ, nɛ e he nyu ɔ ngɛ dɛe ngɛ ye nine nguɛ nya kɛ ngɛ sinya a se lami nɔ́ ɔ nɛ i pɛtɛ he ɔ nɔ puee.

⁶ I bli sinya a ha ye suɔlɔ ɔ, se e je momo. Ao, nɛ́ i ko nu e gbi kɛkɛ ɔ! I hla lɛ, se i nɛ́ lɛ. I tsɛ lɛ, se i nui e he.

⁷ Buli ɔmɛ nɛ ngɛ si poe ngɛ ma a mi ɔ ba na mi; a fia mi nɔ́, a plaa mi; nɛ buli ɔmɛ nɛ ngɛ gbogbo ɔ nɔ ɔ kpɔ ye hɛ mi hami nɔ́ ɔ kɛ je.

⁸ Yerusalem yihi, nyɛ ka mi kita kaa ke nyɛ na ye suɔlɔ ɔ, nyɛ ma de lɛ ke e he suɔmi ngɛ mi gbee.

Yi ɔmɛ

⁹ Mo nɛ o he ngɛ fɛu pe yihi tsuo, mɛni o suɔlɔ ɔ kɛ pe suɔli kpahi? Mɛni ngɛ nyakpɛ tsɔ ngɛ o suɔlɔ ɔ he, nɛ o deɔ wɔ ke wa ka mo kita a?

Yo ɔ

¹⁰ Ye suɔlɔ ɔ he ngɛ fɛu saminya, nɛ e he wa hulɔ. Ke a kane nyumuhi akpe nyɔngma loko a ma na e nɔ nɔ kake.

¹¹ E yi ngɛ kaa sika tsu ngmingmiingmi; e yi bwɔmi yuɔ tslitsliitsli kaa kuakualabite, nɛ e dɔ bɔdɔɔ kɛ pue e yi mi.

¹² E hɛngmɛhi ngɛ fɛu kaa lahuɛhi nɛ du a he saminyayoo, nɛ a he ngɛ kpɛe kaa tɛ nɛ he jua wa kɛ daa si ngɛ pa nɛ ngɛ bee nya.

¹³ E tsitsa ngɛ kaa abɔɔ ko nɛ tsopa kɛ e he via ngɛ via jee liliili ngɛ mi. E nya lo ngɛ kaa nga nɔ mɔmɔhi nɛ mimɛ nyu pɔ mɛ.

¹⁴ Sika tsu gahi nɛ tɛ kpakpahi hɔɔ si ngɛ a mi ngɛ e kɔnihi a he. E nɔmlɔ tso ngɛ kaa suɔ wu nɛ a kɛ tɛ kpakpahi nɛ hɛɛ bluu su hɔɔ si ngɛ a mi.

¹⁵ E fiɔhi ngɛ kaa tɛ hiɔ titimahi nɛ a kɛ ma sika tsu níhi a mi. Ye suɔlɔ ɔ hɛ mi nyami ngɛ kaa Lebanon yo ɔmɛ kɛ a nɔ seda tso saminyawiiwi nɛ ka gagaaga.

¹⁶ E nya mi munyu ngɔɔ; e he nɔ́ tsuaa nɔ́ peeɔ mi akɔnɔ. Yerusalem yihewi, ye suɔlɔ kɛ ye huɛ ɔ, bɔ nɛ e ngɛ ji nɛ ɔ nɛ.