Lahi 4 - BAIBLO ALOO NGMAMI KLƆUKLƆU Ɔ

Nyumu ɔ

¹ Ye afɛu yo; o he ngɛ fɛu saminya! Hyɛ bɔ nɛ o hɛngmɛ ɔmɛ ngɛ kpɛe kɛ suɔmi ngɛ o hɛ mi hami nɔ́ ɔ se. O yi bwɔmi ngɛ doe ngɛ o yi nɔ kaa to akpakpo kuu nɛ a ngɛ tuue ngɛ Gilead yoku ɔmɛ a nɔ.

² O lunguhi hiɔ kaa jijɔhi nɛ a sã a he bwɔmi, nɛ́ a du a he ha mɛ kɛ́ we. O lungu ɔmɛ a yibɔ su; a kpe sioo ngɛ o nya mi.

³ O nya lo ngɛ kaa kpa tsu. Ke o pa o nya mi nɛ o maa tu munyu ɔ, e ngɛ fɛu kɛkɛ. O tsitsa ngɛ tsɛ̃e ngɛ o hɛ mi hami nɔ́ ɔ se.

⁴ O kuɛ ngɛ legelege, nɛ e ngɛ tlotlootlo; kuɛ ní nɛ kplaa si ngɛ he ɔ ngɛ kaa David mɔ ɔ nɛ tsɛ̃i akpe kplaa si ngɛ he kɛ kpe.

⁵ O nyɔ ɔmɛ ngɛ kaa batslɔhi, loo odabɔ hawi enyɔ nɛ a ngɛ ní yee ngɛ nga nɔ mɔmɔhi a mi.

⁶ Ma hi yo ɔ nɔ he nɛ mimɛ ngɛ ɔ; ma hi yoku ɔ nɔ he nɛ tsopa kɛ e he via ngɛ ɔ, kɛ yaa su be nɛ mɔtu kɔɔhiɔ ma bɔni fiami, nɛ je mi ma tsɔ.

⁷ Ye afɛu yo, o he ngɛ fɛu tsɔ; o he ngɛ fɛu kɛ pi si!

⁸ Ye we ayɛflo, ba nɛ wa kple si kɛ je Lebanon yo ɔmɛ a nɔ; ha nɛ waa je Lebanon; waa je Amana yo ɔ yi mi; waa je Senir kɛ Hermon yo ɔmɛ a yi mi he nɛ jatahi kɛ ngatsɛhi hii ɔ.

⁹ Ye nyɛmiyo, ye we ayɛflo nɛ i suɔ mo saminya; hɛngmɛ nɛ o kɛ hyɛ mi, kɛ o kuɛ ní nɛ o wo nɛ ɔ gbe ye tsui kulaa.

¹⁰ O suɔmi ɔ jɔɔ ye bua. Ye tsui kpa, kɛ ye we ayɛflo nɛ i suɔ mo saminya, o suɔmi ɔ ngɔɔ pe wai. O nu via a he via pe tsopa kɛ e he via slɔɔto ɔmɛ tsuo.

¹¹ Ye we ayɛflo nɛ i suɔ, ke a fiɔ o nya he ɔ, e ngɔɔ kaa hwo, o lilɛ ngɛ kaa nyɔ nyu kɛ hwo ha mi; o bo mi he via kaa Lebanon he via.

¹² Ye nyɛmiyo, ye we ayɛflo nɛ i suɔ mo saminya, o ngɛ kaa abɔɔ nɛ a ngmɛ nya; o ngɛ kaa nyu vu nɛ a sɔu nya.

¹³ Abɔɔ nɛ ɔ mi ɔ, tso slɔɔtohi nɛ bɔɔ kaa tso nɛ yiblii ngɔɔ saminya a ngɛ lejɛ ɔ, nɛ a woɔ yiblii kpakpahi. Tsohi nɛ pɔ he ngɛ lejɛ ɔ ji hena, nardo,

¹⁴ safron, kalamo, kɛ sinamon, loo tsopa kɛ e he via kpa slɔɔtoslɔɔtohi. Mimɛ kɛ tsopa tso kpahi nɛ jee via hu pɔ he ngɛ lejɛ ɔ.

¹⁵ A bɔɔ ɔ naa nyu nɛ haa nɔ wami kɛ jee vuhi, pahi nɛ ngɛ bee, kɛ pa wawi nɛ jee Lebanon yo ɔ nɔ ɔ a mi.

Yo ɔ

¹⁶ Kɔɔhiɔ nɛ je omleyi je, tee si koo. Kɔɔhiɔ nɛ je leneyi je, tee si nɛ o fia kɛ ya gu ye we abɔɔ ɔ mi, konɛ lejɛ ɔ tsuo nɛ je via. Ha nɛ ye suɔlɔ ɔ nɛ ba e we abɔɔ ɔ mi, nɛ e ba ye e mi tso yiblii nɔ́ nɛ hi pe kulaa a.