Lahi 3 - BAIBLO ALOO NGMAMI KLƆUKLƆU Ɔ

¹ Nyɔ mi, ke i hwɔ si ɔ, i nlaa ye suɔlɔ ɔ. I hla kaa ma na lɛ, se i nɛ́ lɛ.

² I hla lɛ kɛ ya kpa ma a mi ngɛ gbɛjegbɛ ɔmɛ a nɔ, kɛ nane blɔ ɔmɛ a nɔ. I hla ye suɔlɔ ɔ hluu, se i nɛ́ lɛ.

³ Ma a mi buli ɔmɛ nɛ ngɛ si poe ngɛ ma a mi ɔ kɛ mi ba kpe. I bi mɛ ke, “Nyɛ na ye suɔlɔ ɔ ha mi lo?”

⁴ Benɛ i be a he bɔɔ pɛ kɛkɛ nɛ i na lɛ, nɛ i fua lɛ atuu; nɛ i ngmɛɛ we e he kɛ ya si i kɛ lɛ ya su ye we ɔ mi, kɛ ya sɛ tsu mi he nɛ a fɔ mi ngɛ ɔ.

⁵ Yerusalem yihi, nyɛɛ wo mi si! Nyɛ ka mi kita kaa nyɛ na odabɔ nɛ he sɔɔ, kɛ batslɔɔ kaa nyɛ be ye suɔlɔ ɔ tsɛe kɛ yaa si be nɛ lɛ nitsɛ e maa te si.

La etɛne Nyumu ɔ

⁶ Mɛni je nga kplanaa a nɔ kɛ ma nɛ ɔ? Mɛni lɛ ma kaa la su ku kusuu nɛ ɔ? Mɛni ji nɛ ɔ kɛ e he via kaa tsopa kɛ e he via, aloo mimɛ, aloo jua yeli a tsopa kpa komɛ nɛ jee via a?

⁷ Salomo ji nɔ nɛ ma a nɛ; a tloo lɛ ngɛ tsokpo mi kɛ ma. Israel tatsɛmɛ kpanakpanaa a kpɛti nyingmi ekpa ji tabo nɛ ngɛ e he bue kɛ ma.

⁸ A ti nɔ tsuaa nɔ mia kɛ klaate nɛ e kɛ ma fa e he ke a ma ba tua mɛ nyɔ mi.

⁹ A tloo Matsɛ Salomo ngɛ tsokpo saminyayoo ko mi. Lebanon tso kpakpa a kɛ pee tsokpo ɔ.

¹⁰ A ha si mami tso ɔmɛ a he sika hiɔ; bo nɛ a kɛ sika tsu lo ní kɛ wo mi nɛ a kɛ ha tsokpo ɔ nitsɛ he; nɛ he nɛ a hii ɔ lɛɛ bo he jua wawɛ nɛ hɛɛ alamua tu su a kɛ ha lejɛ ɔ. Bo nɛ a kɛ dla tsokpo ɔ mi ɔ, Yerusalem yi ɔmɛ lɛ a lo ní saminyawiiwi kɛ wo mi.

¹¹ Zion yihi, nyɛɛ ba nɛ nyɛ ba hyɛ Matsɛ Salomo. Jlasi nɛ e nyɛ bu lɛ matsɛ ɔ yo kpeemi ligbi ɔ ngɛ e yi. Yo kpeemi ligbi ɔ, a nya, nɛ a bua jɔ wawɛɛ nitsɛ.