Lahi 2 - BAIBLO ALOO NGMAMI KLƆUKLƆU Ɔ

¹ Sharon pú mi mɔmɔ kɛkɛ ji mi; kɔ̃ mi mɔmɔ ko kɛkɛ ji mi.

Nyumu ɔ

² Ye afɛu yo nɛ i suɔ mo saminya, bɔ nɛ nga nɔ mɔmɔ ngɛ ngɛ miohi a mi ɔ, jã o ngɛ kɛ ha mi ngɛ yihi tsuo a kpɛti.

Yo ɔ

³ Ke a ngɔ ye suɔlɔ ɔ ngɔ to nyumu kpa amɛ a he ɔ, e ngɛ kaa tso nɛ yiblii ngɔɔ saminya ngɛ pú mi tsohi a kpɛti. I suɔ nɛ ma hi e hɔ̃ ɔ mi; e yiblii ɔ ngɔɔ ye nya.

⁴ E kɛ mi ba e asa a nɔ niye he ɔ; lejɛ ɔ nɛ e je e suɔmi kpo ngɛ kɛ ha mi.

⁵ Nyɛ ha mi wai yiblii gbigbli nɛ ma ye, konɛ ma na he wami. Nyɛ ha mi tso yiblii nɛ ngɔɔ saminya nɛ ma kɛ jɔɔ ye tsui he; ejakaa suɔmi ɔ ngɛ mi gbee.

⁶ Ye yi fɔɔ si ngɛ e muɔ kɔni nɔ, nɛ e ngɔ e hiɔ nine kɛ fua mi.

⁷ Yerusalem yihi, nyɛɛ wo mi si; nyɛ ka mi kita kaa nyɛ na odabɔ nɛ he sɔɔ, kɛ batslɔɔ kaa nyɛ be ye suɔlɔ ɔ tsɛe kɛ yaa si be nɛ lɛ nitsɛ e maa te si.

La enyɔne Yo ɔ

⁸ I nu ye suɔlɔ ɔ gbi. E ngɛ hiie ngɛ yo ɔmɛ a nɔ kɛ ma; e ngɛ fo tue ngɛ yoku ɔmɛ a nɔ kɛ ma ye ngɔ.

⁹ Ye suɔlɔ ɔ ngɛ kaa batslɔɔ; e ngɛ kaa oflote niheyo. O nɛ lɛ nɛ daa si ngɛ wa tsu ɔ se. E ngɛ saflɛ ɔ mi hyɛe; e ngɛ saflɛ puɔ ɔmɛ a mi flie.

¹⁰ Ye suɔlɔ ɔ ngɛ mi nɔ́ ko dee. Ye suɔlɔ, ye afɛu yo; ba nɛ waa ho koo!

Nyumu ɔ

¹¹ Fĩɛ be ɔ be; hiɔmi hu kpa nɛmi.

¹² Mɔmɔ ɔmɛ gba tii ngɛ nga a nɔ. Lohwe pɛlitsɛmɛ a lami be ji nɛ ɔ nɛ. Lahuɛhi a la he wa ngɛ nue ngɛ pú ɔ mi ɔ nɛ.

¹³ Ngmɔkɔ bɔni fumi. Kɔɔhiɔ mi hyi kɛ wai yiblii he via. Ye suɔlɔ, ye afɛu yo; ba nɛ waa ho koo!

¹⁴ O ngɛ kaa lahuɛ nɛ ya laa e he ngɛ tɛ sa puɔ mi. Ha nɛ ma na o hɛ mi. O he ngɛ fɛu loo. Ha nɛ ma nu o gbi. O gbi ngɔɔ loo!

¹⁵ Nyɛɛ nuu kɔkɔbo ɔmɛ ha wɔ. Nyɛɛ nuu kɔkɔbo tsɔwi ɔmɛ nɛ puɛɔ wai ngmɔ ɔmɛ ɔ; ejakaa wai ngmɔ ɔmɛ gba mɔmɔ.

Yo ɔ

¹⁶ I ngɔ ye he ngɔ ha ye suɔlɔ ɔ, nɛ lɛ hu e ngɔ e he ngɔ ha mi. He nɛ nga nɔ mɔmɔhi ngɛ ɔ, lejɛ ɔ e haa e to ɔmɛ ní ngɛ.

¹⁷ E haa mɛ ní hluu kɛ ya siɔ mɔtu kɔɔhiɔ bɔni fiami, nɛ je mi tsɔɔ. Kpale kɛ ba, ye suɔlɔ; kpale kɛ ba kaa batslɔɔ, kpale kɛ ba kaa oflote niheyo ngɛ Beter yo ɔmɛ a nɔ.