Lahi 1 - BAIBLO ALOO NGMAMI KLƆUKLƆU Ɔ

¹ Salomo la amɛ a mi nɔ́ nɛ ngɔɔ pe kulaa ji nɛ ɔmɛ nɛ.

Kekleekle la Yo ɔ

² Mo fiɔ ye nya he si abɔ nɛ o suɔ. O suɔmi ɔ ngɔɔ pe wai dɔkɔdɔkɔ.

³ O he ngɛ via jee kaa nɔ́ ko; ke a wo o biɛ ta pɛ a kaiɔ o he via a; lɔ ɔ he nɛ yi ɔmɛ tsuo suɔ mo ɔ nɛ.

⁴ Ngɔɔ mi kɛ ho esɔ. Ye matsɛ, ngɔɔ mi kɛ ya o tsu ɔ mi. I ngɔ ye he kɛ ha mo. Wa bua maa jɔ wa he saminya. O suɔmi ɔ ngɔɔ dɔkɔdɔkɔ pe wai po. E be nyakpɛ kaa yi ɔmɛ tsuo suɔ mo!

⁵ Nyɛ Yerusalem yihewi! I yuɔ, nɛ ye he ngɛ fɛu saminyayoo. I ngɛ kaa bo tsu nɛ ngɛ Kedar a. Ye he fɛu ɔ, Matsɛ Salomo mɔ ɔ mi tsu mi pomi bo ɔmɛ a he fɛu ɔ pɛ a kɛ maa to he.

⁶ Nyɛ ko hyɛ mi maa ngɛ yumi nɛ i yu ɔ he; pu la nɛ pee ye he womi ja. Ye nyɛminyumu ɔmɛ a mi mi fu mi, nɛ a ha i ya tsu ní ngɛ wai ngmɔ ɔmɛ a mi. I na we deka ko kulaa kɛ ha ye nɔmlɔ tso ɔ.

⁷ Ye suɔlɔ, mo de mi. Jije o ma tsɔ̃ o to ɔmɛ kɛ ya nɛ a ya ye ní? Ke pu nya wa a, jije o maa jɔɔ o he ngɛ? Mɛni he je nɛ ma hi si kpae kɛ hi mo hlae ngɛ to hyɛli kpa amɛ a to ɔmɛ a kpɛti ɔ?

Nyumu ɔ

⁸ Mo nɛ o he ngɛ fɛu pe yihi tsuo, o li lejɛ ɔ? Yaa nɛ o ya nyɛɛ to ɔmɛ a se. Yaa ha o to ɔmɛ ní ngɛ to hyɛli ɔmɛ a bo tsu ɔmɛ a kasa nya.

⁹ Mo, ye afɛu yo nɛ i suɔ, ma ngɔ mo kɛ to okpɔngɔ ku nɛ gblaa Farao ɔ zugba lɛ he.

¹⁰ O yi bwɔmi ngɛ fɛu ngɛ o tsitsa he; bwɔmi ɔ kplaa si ngɛ o kuɛ he kaa june.

¹¹ Se kɛ̃ ɔ, wa maa pee sika tsu ga kɛ e he sika hiɔ níhi ha mo.

Yo ɔ

¹² Ye matsɛ ɔ kpasa si ngɛ e we akpasa mi, nɛ ye nu kɛ e he via a ngɛ via jee liliili ngɛ lejɛ ɔ tsuo.

¹³ Ye suɔlɔ ɔ ngɛ ye gugue mi; e he ngɛ via jee kaa mimɛ.

¹⁴ Ye suɔlɔ ɔ ngɛ kaa pú mi mɔmɔ saminyayoo; e ngɛ kaa mɔmɔhi nɛ gbaa ngɛ Engedi wai ngmɔ ɔmɛ a mi ɔ eko.

Nyumu ɔ

¹⁵ Ye afɛu yo nɛ i suɔ, o he ngɛ fɛu. O hɛngmɛ ngɛ dɔkɔɔ kaa lahuɛ hɛngmɛ!

Yo ɔ

¹⁶ Ye suɔlɔ kpakpa pe kulaa, hyɛ bɔ nɛ o he ngɛ bua jɔmi ha! Nga mumu nɔ wa maa hwɔ,

¹⁷ he nɛ seda tso ngua amɛ ngɛ ɔ; nɛ sɛsɛo tso ɔmɛ maa ha wa yi nɔ.