La 98 - BAIBLO ALOO NGMAMI KLƆUKLƆU Ɔ

Mawu ji je ɔ nɔ yelɔ

¹ Nyɛ la la he ha Yawɛ, ejakaa e pee nyakpɛ níhi. E ngɔ lɛ nitsɛ e he wami kpetekpleenyɛ nɛ ngɛ klɔuklɔu ɔ kɛ ye kunimi ha e he.

² Yawɛ je e he kpo kaa Mawu nɛ heɔ nɔ yi wami. E ha nɛ je ma amɛ le faii kaa dami sane yelɔ ji lɛ.

³ Si ko nɛ e wo Israel ma a, e ye nɔ; e ye mɛ anɔkuale, nɛ e na mɛ mɔbɔ babauu. Nihi ngɛ je ɔ mi he tsuaa he na kaa wa Mawu ɔ ye kunimi.

⁴ Je ɔ tsuo, nyɛ hwɔ lele kɛ ha Yawɛ. Nyɛ he ose, nɛ nyɛ la kɛ bua jɔmi kɛ je e yi.

⁵ Nyɛ la, nɛ nyɛɛ fia kpa saku kɛ to he nɛ nyɛ kɛ je Yawɛ yi.

⁶ Nyɛ kpa titimati, kɛ koli, nɛ nyɛɛ kɛ bua jɔmi hwɔ lele kɛ ha Yawɛ, wa matsɛ ɔ.

⁷ Wo, kɛ o mi níhi tsuo, nyɛɛ wo gbi! Je ɔ, kɛ níhi tsuo nɛ ngɛ mi, nyɛ la!

⁸ Nyɛ pahi, nyɛɛ fia nyɛ dɛ! Nyɛ yokuhi tsuo, nyɛ nya ngɛ Yawɛ hɛ mi,

⁹ ejakaa e ma nɛ e ba kojo je ɔ. Yawɛ maa kojo je ɔ ngɛ dami, kɛ anɔkuale nya.