La 96 - BAIBLO ALOO NGMAMI KLƆUKLƆU Ɔ

Mawu, matsɛ kpetekpleenyɛ ɔ

¹ Nyɛ la la he ha Yawɛ! Nyɛ je ɔ tsuo, nyɛ la ha Yawɛ!

² Nyɛ la ha Yawɛ; nyɛ je e yi! Nyɛɛ fiɛ sane kpakpa a daa ligbi ke Yawɛ he wa yi wami.

³ Nyɛɛ fiɛ nɛ je ma amɛ tsuo nɛ a nu kaa Yawɛ hɛ mi ngɛ nyami, kaa e tsuɔ ní nguanguahi.

⁴ Yawɛ kle agbo; e sa nɛ a je e yi wawɛɛ nitsɛ. E sa nɛ a wo e hɛ mi nyami pe mawu ɔmɛ tsuo.

⁵ Je ma kpa amɛ a mawu ɔmɛ ɔ, amagahi kɛkɛ ji mɛ. Yawɛ lɛɛ lɛ nɛ e bɔ hiɔwe.

⁶ Hɛ mi nyami kɛ agboje bɔle lɛ kɛ kpe; he wami, kɛ afɛu ní hyi e we ɔ.

⁷ Nyɛ je ma amɛ tsuo, nyɛ je Yawɛ yi. Nyɛ je e hɛ mi nyami, kɛ e he wami ɔ yi.

⁸ Nyɛ je Yawɛ biɛ klɔuklɔu ɔ yi; nyɛɛ ngɔ nike ní kɛ ba e we ɔ.

⁹ Nyɛɛ pee klɔuklɔu nɛ nyɛ ja Yawɛ; nyɛ je ɔ tsuo, nyɛ he nɛ do blibliibli ngɛ e hɛ mi.

¹⁰ Nyɛ de je ma amɛ tsuo ke, “Yawɛ ngɛ matsɛ yee! A ngɔ je ɔ ngɔ ma si ngɛ e hi he, nɛ nɔ ko be nyɛe ma mimiɛ lɛ. E maa kojo je ma amɛ ngɛ dami nya.”

¹¹ Hiɔwe, kɛ zugba, nyɛ nya! Wo, kɛ o mi níhi tsuo, nyɛɛ wo gbi.

¹² Ngmɔhi, kɛ nyɛ a nɔ níhi tsuo, nyɛ nya! Pu mi tsohi tsuo ma hwɔ lele

¹³ ngɛ Yawɛ hɛ mi, ejakaa e ma! Ee, Yawɛ ma nɛ e ba kojo je ɔ. Yawɛ maa kojo je ɔ ngɛ dami kɛ anɔkuale nya.