La 94 - BAIBLO ALOO NGMAMI KLƆUKLƆU Ɔ

Mawu ji adesahi tsuo a kojolɔ

¹ Yawɛ, mo Mawu nɛ o yeɔ lue, mo je o he kpo koo!

² Mo je ɔ tsuo kojolɔ, tee si nɛ o wo he nɔ woli hiɔ bɔ nɛ sa mɛ.

³ Yawɛ, kɛ yaa si mɛni be lɛ yayami peeli maa hi nyae? A maa hi mle yee kɛ yaa si mɛni be?

⁴ Yayami peeli maa hi munyu tue puu kɛkɛ, nɛ a maa hi fĩae kɛ yaa si mɛni be?

⁵ Yawɛ, a ngɛ o ma a yi mi wae. Mo nitsɛ o nihi nɛ o suɔ ɔ, a ngɛ mɛ awi yee.

⁶ A ngɛ yalɔyihi, kɛ awusahi gbee; nibwɔhi nɛ ngɛ wa zugba a nɔ hu, a ngɛ a muɔ si puee ja nɔuu.

⁷ Nɔ́ nɛ a deɔ ji, “Oo, Yawɛ tsa nɛ wɔ! Israel Mawu ɔ hyɛ we!”

⁸ Ye ma, mɛni he je lɛ nyɛ biɛ kikɛ nɛ ɔ? Kuasiahi, mɛni be nyɛ maa le nɔ́?

⁹ Nɔ nɛ pee wa tue ɔmɛ ɔ, e nui nɔ́ lo? Nɔ nɛ pee hɛngmɛ ɔmɛ ɔ, e hyɛ we nɔ́ lo?

¹⁰ Nɔ nɛ tsɔseɔ je ma amɛ ɔ, anɛ e be a tue gblae lo? Nɔ nɛ tsɔɔ adesahi tsuo ní ɔ, anɛ e be juɛmi lo?

¹¹ Yawɛ le bɔ nɛ adesa susuɔ e yi mi. E le kaa nɔmlɔ juɛmi sui he ko kulaa.

¹² Yawɛ, nɔmlɔ nɛ o tsɔseɔ lɛ, nɛ o tsɔɔ lɛ o mlaa a, a gbaa lɛ.

¹³ Haomi be mi tete po, o haa lɛ he jɔmi hluu kɛ ya siɔ be nɛ o tsuaa muɔ ha yayami peelɔ nɛ e ba nɔ mi.

¹⁴ Yawɛ be e ma a he ngmɛɛe kɔkɔɔkɔ; nihi nɛ e je blɔ hla mɛ ɔ, e be mɛ kuae.

¹⁵ A maa ye dami sane ngɛ kojomi he ɔmɛ ekohu; nɛ dali tsuo ma nya he.

¹⁶ Mɛnɔ maa piɛ ye he nɛ waa te si kɛ wo yiwutsotsɛmɛ? Mɛnɔ maa piɛ ye he, nɛ waa kɛ yayami peeli ya to ní?

¹⁷ Ke pi Yawɛ nɛ piɛ ye he ɔ, jinɛ be nɛ ɔ mi i su gbeje momo.

¹⁸ Benɛ i de ke, “I miɔ nɛ ma sane nɔ si ɔ,” mo Yawɛ, o suɔmi nɛ be nyagbe ɔ wo ye nɔ.

¹⁹ Ke yi mi susumi tsɔ ha nɛ i pee basaa kikɛ nɛ ɔ, mo lɛ o haa mi bua jɔmi, nɛ ye nɔ gbagba tee ekohu.

²⁰ Kojoli nɛ yi dami sane, kɛ ni nɛmɛ nɛ woɔ mlaa yaya a, anɛ o kɛ mɛ maa bɔ lo?

²¹ A soɔ dali a yi nɔ, nɛ nihi nɛ pee we nɔ́ ko ɔ, a buu mɛ gbenɔ fɔ.

²² Se Yawɛ faa ye he; ee, ye Mawu ɔ buu ye he.

²³ Yawɛ ma ha nɛ a ní yayami ɔmɛ ma bu mɛ nitsɛmɛ a nɔ. E ma kpata a hɛ mi ngɛ a yayami ɔmɛ a he; Yawɛ, wa Mawu ɔ ma kpata a hɛ mi pɛsɛpɛsɛ.