La 92 - BAIBLO ALOO NGMAMI KLƆUKLƆU Ɔ

Yi jemi la kɛ ha Hejɔɔmi ligbi

¹ Yawɛ, e hi kaa a na mo si. E hi kaa a la kɛ je mo, Hiɔwe No ɔ o yi.

² Daa mɔtu ɔ, á tu o suɔmi nɛ ngɛ daa a he munyu; daa nyɔ mi hu, á fiɛ kaa o yeɔ anɔkuale.

³ A fia kpa saku, kɛ saku kpahi nɛ a la kɛ to he.

⁴ Yawɛ, o ní tsumi ɔmɛ haa mi bua jɔmi; Ma la kɛ bua jɔmi ngɛ o nine nya ní tsumi ɔmɛ a he.

⁵ Yawɛ, bɔ nɛ o ní tsumi ɔmɛ kle ɔ, ja nɔuu o juɛmi hu mi kuɔ.

⁶ Nɔ nɛ biɛ be enɛ ɔ lee; kuasia hu be sisi nue.

⁷ Yiwutsotsɛmɛ maa bɔ flɔflɔɔflɔ kaa nga; yayami peeli ma plɔke, nɛ a ma na a he, se nyagbe ɔ, a hɛ mi ma kpata kɛ̃.

⁸ Se mo Yawɛ, moo lɛɛ o maa ye tsɛ daa.

⁹ Hyɛ, mo Yawɛ, o he nyɛli ɔmɛ tsuo pɛpɛɛpɛ a hɛ mi ma kpata. A maa gbɛ yiwutsotsɛmɛ tsuo ngɔ fĩa.

¹⁰ O ha nɛ i na he wami kaa pu mi na. O gbaa mi kɛ bua jɔmi babauu.

¹¹ Ye he nyɛli ɔmɛ a hɛ mi kpata, nɛ i na kɛ ye hɛngmɛ. I nu hulɔ kɛ ye tue kaa nihi nɛ te si wo mi ɔ nɔ si.

¹² Dali ma plɔke kaa tã; a maa wa kaa seda tso ngɛ Lebanon.

¹³ A ngɛ kaa tsohi nɛ a du ngɛ Yawɛ we ɔ, tsohi nɛ bɔ ngɛ wa Mawu ɔ kue ɔmɛ a mi.

¹⁴ A ngɛ kaa tsohi nɛ woɔ yiblii ngɛ a bwɔmi be mi tete po, tsohi nɛ ngɛ flɔflɔɔflɔ, nɛ́ nyu tɛ a mi gblegbleegble.

¹⁵ Enɛ ɔ tsɔɔ kaa Yawɛ da. Nɔ nɛ buɔ ye he ɔ, yayami ko be e he.