La 91 - BAIBLO ALOO NGMAMI KLƆUKLƆU Ɔ

Mawu ji wa he bulɔ

¹ Nɔ nɛ hii Hiɔwe No ɔ laami he ɔ, Ope ɔ nitsɛ maa baa e yi.

² E ma de Yawɛ ke, “Mo ji ye wesa he, kɛ ye he bulɔ. Mo ji ye Mawu; i ngɔ ye hɛ kɛ fɔ o nɔ.”

³ E ma je mo kɛ je klamahi nɛ a tsɔ mo ɔ tsuo mi. E ma je mo kɛ je gbenɔ hiɔ hu mi ja nɔuu.

⁴ E maa bu o he, nɛ o yi ma na wami kaa lohwe pɛlitsɛ bi ngɛ e nyɛ pɛli sisi. Si nɛ e wo ke e maa ye mo anɔkuale ɔ maa pee kaa tsɛ̃i, kɛ dama nɛ ma fa o he.

⁵ O be nyɔ mi ní yayamihi, loo piani oslaa kaa kɛ̃ɛ̃ mi bi kikɛ nɛ ɔ gbeye yee.

⁶ Gbenɔ hiɔ nɛ puɛɔ ní ngɛ diblii mi ɔ, o be lɛ gbeye yee. Piani hu o be hiɔ nɛ kpataa nɔ hɛ mi gbeye yee.

⁷ Nimli akpe ma gbo ngɛ o kasa nya; akpe nyɔngma ma gbo kɛ bɔle mo kɛ kpe, se moo lɛɛ nɔ́ ko nɔ́ ko be o he sae.

⁸ O hɛngmɛ kɛkɛ lɛ o kɛ maa hyɛ bɔ nɛ a maa gbla yayami peeli a tue ha.

⁹ Akɛnɛ o ngɔ Yawɛ, Hiɔwe No ɔ kɛ pee o he bulɔ, kɛ o wesa he he je ɔ,

¹⁰ nɔ́ ko nɔ́ ko be o he sae; o we ɔ mi hu, haomi ko be lejɛ ɔ bae.

¹¹ Mawu ma ha nɛ e bɔfo ɔmɛ maa bu o he ngɛ he tsuaa he nɛ o maa ya.

¹² A maa hɛɛ mo ngɛ kɔɔhiɔ mi, bɔ nɛ pee nɛ o ko tɛ nɔ.

¹³ O maa naa jata, kɛ sanga nɔ; o maa naa jata bi kɛ sinɔ nɔ.

¹⁴ Bɔ nɛ Mawu ngɛ dee ji nɛ ɔ nɛ: “Nɔ nɛ suɔ mi, nɛ e le ye biɛ Yawɛ ɔ, ma he e yi wami, nɛ ma bu e he.

¹⁵ Ke e tsɛ mi ɔ, ma he nɔ; ke haomi ba e nɔ ɔ, ma piɛ e he. Ma je lɛ, nɛ ma wo e hɛ mi nyami.

¹⁶ Kpakpa nɛ ma pee lɛ ji, ma ha nɛ e wami se maa kɛ, nɛ ma he e yi wami.”