La 90 - BAIBLO ALOO NGMAMI KLƆUKLƆU Ɔ

WOMI EYWIƐNE ( La 90—106 ) Mawu kɛ adesa

¹ Nyɔmtsɛ, mo ji wa wesa he ngɛ yi nɔhi tsuo a mi.

² Benɛ o na we nɛ o bɔ yo ɔmɛ; benɛ o na we nɛ o bɔ je ɔ, mo ji Mawu nɛ ngɛ kɛ je neneene kɛ yaa si neneene.

³ O deɔ adesa ke, “Kpale kɛ ya o je he!” Kɛkɛ ɔ, nɔmlɔ plɛɔ peeɔ tabo zu.

⁴ Moo lɛɛ jeha akpe ngɛ kaa ligbi kake ha mo; e ngɛ kaa hiɛmɛ a je hiɛ nɛ be momo, aloo be bɔɔ kɛkɛ ngɛ nyɔ mi.

⁵ O ngɔɔ wɔ kɛ yaa kaa bɔ nɛ pa muɔɔ níhi kɛ yaa a; wa wami be ɔ tsuo ngɛ kaa mahe nɛ a hwɔ. Wa ngɛ kaa hu nɛ puɛɔ flɔflɔɔflɔ mɔtu.

⁶ Mɔtu ɔ, e blɛkeɔ saminyayoo, se gbɔkuɛ ɔ, e nglaa, nɛ e gboɔ.

⁷ O mi mi la a kpataa wa hɛ mi; o mi mi la a woɔ wa he gbeye.

⁸ O ngɔ wa he yayami ɔmɛ ngɔ pue o hɛ mi; wa diblii mi yayami ɔmɛ tsuo ngɛ o hɛ mi paa.

⁹ Ke o mi mi fu wɔ ɔ, o poɔ wa wami be ɔ nɔ kpiti kaa a woɔ mumi.

¹⁰ Wa wami be ɔ tsuo ji jeha nyingmi kpaago. Ke wa ngɛ he wami ɔ, wa naa nyingmi kpaanyɔ, se lɛ tsuo peeɔ haomi kɛ aywilɛho sɔuu. Wa wami se poɔ tlukaa; nɛ wa bee kɛ yaa kaa lohwe pɛlitsɛmɛ nɛ te kɛ bee.

¹¹ Mɛnɔ lɛ le bɔ nɛ o mi mi fumi ɔ nya wa ha? Bɔ nɛ o he ngɛ gbeye ɔ, ja lɛ o mi mi fumi ɔ ngɛ.

¹² Ha nɛ waa na kaa wa wami se kɛ we kulaa, konɛ waa le ní.

¹³ Mɛni be o mi mi fumi ɔ se maa po? Yawɛ, naa wɔ, o tsɔli ɔmɛ mɔbɔ!

¹⁴ Naa wɔ mɔbɔ daa mɔtu, konɛ wa na bua jɔmi wa wami be ɔ tsuo.

¹⁵ Bɔ nɛ o ha nɛ wa na amanehlu wawɛɛ jeha komɛ nɛ be ɔ, ha nɛ wa na bua jɔmi, nɛ wa nya ja nɔuu ngɛ be nɛ wa ngɛ mi nɛ ɔ mi.

¹⁶ Ha nɛ wɔ, o tsɔli ɔmɛ, waa na o ní tsumi ɔmɛ. Ha nɛ wa bimɛ ɔmɛ nɛ a na o he wami kpetekpleenyɛ ɔ.

¹⁷ Nyɔmtsɛ, wa Mawu, naa wɔ mɔbɔ! Ha nɛ wa ní tsumi nɛ ya nɔ! Ee, ha nɛ wa ní tsumi nɛ ya nɔ!