La 89 - BAIBLO ALOO NGMAMI KLƆUKLƆU Ɔ

Ma a we amanehlu be la

¹ Yawɛ, ma la daa kɛ tsɔɔ kaa o suɔmi ɔ be nyagbe. Ma sɛɛ ha yi nɔhi tsuo ke anɔkuale yelɔ ji mo.

² I le kaa o suɔmi ɔ maa hi si daa. O we anɔkuale yemi ɔ hu be nyagbe; e ngɛ kɛ yaa neneene kaa bɔ nɛ hiɔwe ngɛ ɔ.

³ O de ke, “I kɛ nɔ nɛ i hla lɛ ɔ so somi ko. I ka ye tsɔlɔ David kita ke,

⁴ ‘Ma ha nɛ o nina maa ye matsɛ daa; o matsɛ yemi ɔ maa hi si kɛ maa ya neneene.’ ”

⁵ Yawɛ, hiɔwe ma je nyakpɛ níhi nɛ o ngɛ pee ɔ a yi; a ma la kɛ je o yi kaa o yeɔ anɔkuale.

⁶ Yawɛ, mɛnɔ lɛ ngɛ hiɔwe nɛ ngɛ kaa mo? Hiɔwe nibɔ ní ɔmɛ te nɔ́ nɛ kɛ mo sɔ?

⁷ A buu mo ngɛ ni klɔuklɔuhi a kpe ɔ mi; mɛ tsuo pɛpɛɛpɛ a yeɔ mo gbeye.

⁸ Yawɛ Tabohiatsɛ Mawu! Mɛnɔ lɛ ngɛ he wami kaa mo Yawɛ? O yeɔ anɔkuale ngɛ nɔ́ tsuaa nɔ́ mi.

⁹ Ke wo gli, nɛ oslɔke ngɛ fiae ɔ, mo lɛ o jɔɔ he.

¹⁰ Rahab, wo mi lohwe ɔ nɛ he ngɛ gbeye ɔ, mo lɛ o kpata e hɛ mi pɛsɛpɛsɛ. O kɛ o he wami kpetekpleenyɛ ɔ ye o he nyɛli ɔmɛ a nɔ kunimi.

¹¹ O níhi ji hiɔwe ɔ kɛ zugba a tsuo; mo lɛ o bɔ je ɔ kɛ e mi níhi tsuo.

¹² O bɔ omleyi je, kɛ leneyi je. Tabor yo ɔ, kɛ Hermon yo ɔ ngɛ lae kɛ ngɛ o yi jee.

¹³ He walɔ kpetekpleenyɛ ji mo; o he wami ɔ kle!

¹⁴ O matsɛ yemi ɔ, dami sane yemi nɔ a to lɛ sisi kɛ fɔ. Suɔmi kɛ anɔkuale yemi jeɔ kpo ngɛ o nɔ́ tsuaa nɔ́ peemi mi.

¹⁵ A gbaa nihi nɛ le bɔ nɛ a laa kɛ jaa mo. Mo Yawɛ, o maa na mɛ mɔbɔ daa.

¹⁶ Mo o he ɔ, a bua jɔɔ a he daa nɛ; a jeɔ o yi, ejakaa o hi.

¹⁷ Mo lɛ o haa nɛ a yeɔ kunimi nguahi. Mo lɛ o naa wɔ mɔbɔ loko wa yeɔ manye.

¹⁸ Yawɛ, mo lɛ o hla wa he falɔ ɔ kɛ ha wɔ; mo, Israel Mawu klɔuklɔu ɔ, mo lɛ o ha wɔ wa matsɛ.

Mawu wo David si

¹⁹ Be ko ɔ, o kɛ o tsɔli klɔuklɔu ɔmɛ tu munyu ngɛ nina mi, nɛ o de mɛ ke, “I fi katsɛ ko jlasi. I ngɔ matsɛ sɛ ɔ kɛ ha nɔ ko nɛ i hla kɛ je ma mi bi ɔmɛ a kpɛti.

²⁰ I ngɔ ye nu klɔuklɔu ɔ kɛ pɔ ye tsɔlɔ David, nɛ i wo lɛ matsɛ.

²¹ Ye nine maa hi e he be tsuaa be, nɛ ma wo lɛ he wami.

²² E he nyɛli a nine be e nɔ sue; yayami peeli be nyɛe maa ye e nɔ.

²³ Ma kpata e he nyɛli a hɛ mi; ni nɛmɛ nɛ nyɛɔ lɛ ɔ, ma gbe mɛ tsuo.

²⁴ Ma suɔ lɛ, ma ye lɛ anɔkuale, nɛ ma ha e maa ye kunimi daa.

²⁵ Ma ha nɛ e matsɛ yemi ɔ ma blɛke kɛ je Mediterenia wo ɔ nya kɛ ya su Yufrate pa a he.

²⁶ E ma tsɛ mi ke, ‘Tsaatsɛ, ye Mawu, ye he bulɔ, kɛ ye yi wami helɔ.’

²⁷ Imi hu ma ngɔ lɛ kɛ pee ye bitɛte; ma pee lɛ matsɛ nɛ kle pe je nɛ ɔ mi matsɛmɛ ɔmɛ tsuo.

²⁸ Ma suɔ lɛ, nɛ ma na lɛ mɔbɔ daa; somi nɛ i kɛ lɛ so ɔ se be poe gblegbleegble.

²⁹ E weku kpa se be poe gblegbleegble; e maa hi kaa bɔ nɛ hiɔwe ngɛ ɔ pɛpɛɛpɛ. Daa nɛ ɔ, e nina ko maa hi sɛ ɔ nɔ.

³⁰ “Se ke e nina ya yi ye mlaa amɛ a nɔ, nɛ́ a bɛ a je mi kaa bɔ nɛ i fa mɛ ke a pee ɔ,

³¹ ke a kua ye blɔ nya tomi ɔmɛ, nɛ a yi ye mlaa amɛ a nɔ ɔ

³² lɛɛ ma gbla a tue ngɛ a yayami ɔmɛ a he, nɛ ma ha a maa na nɔ́.

³³ Se kɛ̃ ɔ, suɔmi nɛ i ngɛ kɛ ha mɛ ɔ, jamɛ a suɔmi ɔ be tae gblegbleegble; si ko nɛ i wo David ɔ hu, i be ye nya se kpalee.

³⁴ Somi ɔ nɛ i kɛ lɛ so ɔ, i be se jee; si nɛ i wo lɛ ɔ, i be tsakee.

³⁵ “I kɛ ye biɛ klɔuklɔu ɔ wo si kaa i be David lakpa yee gblegbleegble.

³⁶ E nina maa hi si kɛ maa ya neneene. Ma bu e matsɛ yemi ɔ he be abɔ nɛ pu ngɛ hiɔwe ɔ.

³⁷ E matsɛ yemi ɔ maa hi si daa kaa nyɔhiɔ, jamɛ a anɔkuale odase ɔ nɛ ngɛ hiɔwe ɔ.”

Aywilɛho la, benɛ a ye matsɛ ɔ nɔ ɔ

³⁸ Se nɔ nɛ o pɔ lɛ nu ɔ, o mi mi fu lɛ; o kua lɛ, nɛ o hɛ lɛ ngɔ fɔ he.

³⁹ Somi nɛ o kɛ o tsɔlɔ ɔ so ɔ, o je se; o sake e matsɛ pɛɛ ɔ ngɔ fɔ zugba, nɛ o ble lɛ.

⁴⁰ Gbogbo nɛ a fia kɛ wo ma a he ɔ, o ku lɛ tsuo pue si, nɛ mɔ ɔmɛ plɛ pee ní kokoehi.

⁴¹ Nihi tsuo nɛ guu lejɛ ɔ, juɔ e níhi; e plɛ pee muɔ nɔ́ ha e he nihi po.

⁴² O ha nɛ e he nyɛli ɔmɛ ye kunimi, nɛ mɛ tsuo a na bua jɔmi.

⁴³ Ee, o ha nɛ e ta hwumi ní ɔmɛ pee yaka, nɛ e nyɛ we ta a nya nɛ e da.

⁴⁴ O he e hiɔ ɔ ngɛ e dɛ, nɛ o sake e matsɛ sɛ ɔ ngɔ fɔ zugba.

⁴⁵ O po e nihe mi be ɔ nɔ kpiti, nɛ o ha nɛ e hɛ mi pue si.

Kue fami

⁴⁶ Yawɛ, mɛni be o maa laa o he kɛ ya si? O maa laa o he kɛ maa ya neneene lo? O mi mi fumi nɛ ngɛ kaa la nɛ ngɛ tsoe ɔ, mɛni be lɛ e se maa po?

⁴⁷ Mo kai kaa ye wami be ɔ ngɛ kuku. Mɛni he je lɛ o bɔ nɔmlɔ adesa yaka gu ɔ?

⁴⁸ Te nɔmlɔ nɛ ngɛ je mi, nɛ lɛɛ e be gboe? Mɛnɔ ma nyɛ ma je e he kɛ je gbenɔ dɛ mi?

⁴⁹ Nyɔmtsɛ, suɔmi nɛ o je kpo blema a, jije jamɛ a suɔmi ɔ ngɛ? Níhi nɛ o wo David si ke o maa pee ɔ, jije ní ɔmɛ ngɛ?

⁵⁰ Nyɔmtsɛ, ahlua nɛ a ngɛ o tsɔli ɔmɛ bɔe ɔ, o hɛ ko je nɔ. Jɛmihi tsuo nɛ a ngɛ mi jɛe ɔ, i ma ye nya ngɔ to nɔ.

⁵¹ Yawɛ, nɔmlɔ nɛ o pɔ lɛ nu ɔ, hyɛ kaa o he nyɛli ɔmɛ ngɛ lɛ ahlua bɔe! He tsuaa he nɛ e gu, kɛkɛ jɛmi nyɛɛ e se.

⁵² A je Yawɛ yi daa. Amen! Amen!