La 88 - BAIBLO ALOO NGMAMI KLƆUKLƆU Ɔ

Kue fami kɛ ha yemi kɛ buami

¹ Yawɛ Mawu, ye yi wami helɔ! Nyɔ kɛ pia tsuo i foɔ ya ngɛ o hɛ mi.

² Moo bu ye kue fami ɔ tue koo, nɛ o pee ye hiami ní ɔmɛ ha mi.

³ Haomi babauu ba ye nɔ, nɛ i kɛ gbenɔ he kɛ we saasaa.

⁴ A bu mi ngɔ piɛ nihi tsuo nɛ a miɔ nɛ a ma gbo ɔ a he. Ye he wami ta.

⁵ I pee kaa nɔ ko nɛ a hɛ lɛ ngɔ fɔ ni gbogboehi a kpɛti, nihi nɛ nɔ ta, nɛ a hwɔɔ si ngɛ yɔkɔ mi, nihi nɛ o kaii we mɛ hu, nɛ yemi kɛ buami ko be ha mɛ.

⁶ O sake mi kɛ fɔ yɔkɔ ɔ mi he nɛ kuɔ pe kulaa a. O sake mi kɛ fɔ muɔ voo kɛ e mi diblii kpii ɔ mi.

⁷ O we abofu ɔ nya wa tsɔ ha mi; e ngɛ kaa oslɔke nɛ ngɛ kue kɛ ngɛ ye nɔ puee kpamisa.

⁸ O ha nɛ ye huɛmɛ kua mi; o ha nɛ ye he tsɛ̃ mɛ. I pee kaa nɔ ko nɛ a sa e yi, nɛ e li he nɛ e maa ya.

⁹ Aywilɛho sɔuu ha nɛ ye hɛngmɛ nɔ ha. Yawɛ, i tsɛɔ mo daa nɛ; i woɔ ye nine nɔ, nɛ i faa kue kɛ haa mo daa.

¹⁰ Anɛ ni gbogboehi lɛ o peeɔ nyakpɛ ni kɛ haa lo? Anɛ gbogboehi maa te si, nɛ a ma je o yi lo?

¹¹ O suɔmi nɛ be nyagbe ɔ, anɛ yɔkɔ mi lɛ a maa wo nɔ ta ngɛ lo? O we anɔkuale yemi ɔ, hɛ mi kpatami he ɔ a maa sɛɛ ngɛ lo?

¹² O nyakpɛ ní ɔmɛ ɔ, anɛ diblii mi lɛ a maa na ngɛ lo? Zugba a, he nɛ nihi a hɛ jee níhi a nɔ ngɛ ɔ, lejɛ ɔ lɛ a maa na o dami ɔ ngɛ lo?

¹³ Se Yawɛ, imi lɛɛ mo i ngɛ tsɛe! Daa mɔtu ɔ, i faa kue kɛ haa mo.

¹⁴ Yawɛ, mɛni he je lɛ o kua mi? Mɛni he je lɛ o ngɔ o hɛ mi kɛ laa mi?

¹⁵ Kɛ je ye nihe mi hluu kɛ ba si piɔ ɔ, amanehlu sɔuu lɛ i ngɛ nae, nɛ i miɔ nɛ ma gbo. O gbla ye tue nɛ ye he wami ta.

¹⁶ O mi mi fu mi wawɛɛ nitsɛ; o wo ye he gbeye hluu kɛ ya si ye hɛ mi miɔ nɛ e ma kpata.

¹⁷ Daa ligbi ɔ, gbeye níhi bɔle mi kɛ kpe kaa pa nɛ hia kɛ bee; a po klaangma kɛ wo ye he.

¹⁸ O ha nɛ ye huɛmɛ kpakpahi tsuo kua mi, nɛ diblii ba pee ye huɛ.