La 86 - BAIBLO ALOO NGMAMI KLƆUKLƆU Ɔ

Kue fami kɛ ha yemi kɛ buami

¹ Yawɛ, moo bu ye kue fami ɔ tue, nɛ o pee ye hiami ní ɔmɛ ha mi; ejakaa ye yi fi wawɛɛ nitsɛ.

² Mo he ye yi wami, ejakaa i yeɔ mo anɔkuale. Ye Mawu, mo he mi; ejakaa o tsɔlɔ ji mi, nɛ i ngɔ ye hɛ kɛ fɔ o nɔ.

³ Nyɔmtsɛ, naa mi mɔbɔ; ejakaa mo lɛ i faa kue kɛ haa daa ligbi.

⁴ Nyɔmtsɛ, ha nɛ o tsɔlɔ ɔ nɛ na bua jɔmi, ejakaa mo lɛ i faa kue kɛ haa.

⁵ Nyɔmtsɛ, o hi, nɛ o kɛ yayami paa nɔ. Nɔ tsuaa nɔ nɛ faa kue kɛ haa mo ɔ, o naa lɛ mɔbɔ.

⁶ Yawɛ, moo bu ye kue fami ɔ tue. Pɛɛ nɛ i ngɛ mo kpae ɔ, moo nu ha mi koo!

⁷ Ligbi ɔ nɛ e ma fi mi ɔ, ma tsɛ mo; ejakaa i le kaa o maa pee ye hiami ní ɔmɛ ha mi.

⁸ Nyɔmtsɛ, mawu ko mawu ko be nɛ kɛ mo sɔ; níhi nɛ o pee ɔ hu, nɔ́ ko nɔ́ ko be nɛ a kɛ maa to a he.

⁹ Nyɔmtsɛ, je ma amɛ tsuo nɛ o bɔ ɔ ma ba kpla si ngɛ o hɛ mi, nɛ a ma je o he wami kpetekpleenyɛ ɔ yi.

¹⁰ Ejakaa o kle, nɛ o tsuɔ nyakpɛ níhi. Mo nɔ kake too ji Mawu.

¹¹ Yawɛ, tsɔɔ mi nɔ́ nɛ o suɔ kaa ma pee, nɛ ma ye mo anɔkuale sisiisi. Ha nɛ ma ngɔ ye he wami tsuo kɛ sɔmɔ mo.

¹² Nyɔmtsɛ, ye Mawu, ma je o yi kɛ ye tsui tsuo, nɛ o he wami kpetekpleenyɛ ɔ, ma wo ta daa.

¹³ O na mi mɔbɔ be babauu; gbeje tete po lɛ o je mi kɛ je.

¹⁴ Mawu, he woli, yiwutsotsɛmɛ, kɛ nihi nɛ li mo te si wo mi, nɛ a ngɛ hlae nɛ a gbe mi.

¹⁵ Se mo Nyɔmtsɛ ɔ, Mawu mɔbɔ nalɔ, kɛ Mawu nɛ suɔ nɔ ji mo. O toɔ o tsui si ha wɔ; o dlooɔ nɔ, nɛ o yeɔ nɔ anɔkuale daa.

¹⁶ Plɛ o hɛ mi ha mi, nɛ o na mi mɔbɔ. Wo imi, o tsɔlɔ ɔ he wami, nɛ o kpɔ mi. Ejakaa bɔ nɛ maa, o mawayo ɔ sɔmɔ mo ɔ, jã kɛ̃ lɛ i ngɛ mo sɔmɔe ɔ nɛ.

¹⁷ Yawɛ, tsɔɔ mi o mɔbɔ nami ɔ he okadi ko, konɛ ye he nyɛli ɔmɛ nɛ a na, nɛ zo nɛ gbe mɛ kaa o piɛ ye he, nɛ o jɔɔ ye bua.