La 85 - BAIBLO ALOO NGMAMI KLƆUKLƆU Ɔ

Kue fami kɛ ha ma a nɔ yami

¹ Yawɛ, o na wa zugba a mɔbɔ, nɛ o ha nɛ Israel ná e he ekohu.

² O ngɔ o ma a tɔmi ɔmɛ, kɛ a he yayami ɔmɛ tsuo kɛ pa mɛ.

³ O mi mi la nɛ nya wa a se po, nɛ o mi mi fu we wɔ hu.

⁴ Mawu, wa yi wami helɔ, kpale wɔ kɛ ba o ngɔ ekohu. O mi mi ko fu wɔ hu!

⁵ Anɛ o mi mi ma fu wɔ daa lo? Anɛ o mi mi fumi ɔ ma tsa nɔ kɛ ya yi nɔhi tsuo lo?

⁶ Ha nɛ waa ba nɔ ekohu, konɛ wɔ, o ma a, wa je o yi.

⁷ Yawɛ, naa wɔ mɔbɔ nɛ o he wa yi wami.

⁸ Nɔ́ nɛ Yawɛ Mawu ngɛ dee ɔ, i nu. E ngɛ wɔ, e ni klɔuklɔu ɔmɛ dee ke e ma ha wɔ tue mi jɔmi, se wa ko kpale ya je kuasia hu.

⁹ Niinɛ, Mawu pee klaalo kɛ ma he nihi nɛ jaa lɛ ɔ a yi wami; konɛ hɛ mi nyami nɛ hi wa zugba a mi.

¹⁰ Mɔbɔ nami, kɛ anɔkuale kpe hɛ mi kɛ hɛ mi; dami kɛ tue mi jɔmi fua a sibi atuu.

¹¹ Adesa we anɔkuale ɔ maa je zugba kɛ ya hiɔwe; nɛ Mawu dami ɔ maa hyɛ zugba a kɛ je hiɔwe.

¹² Niinɛ, Yawɛ ma ha wɔ ní kpakpahi, nɛ wa zugba a maa ba ní bɔ nɛ sa.

¹³ Dami maa nyɛɛ Yawɛ hɛ mi, nɛ e ma dla blɔ ngɔ to lɛ.