La 84 - BAIBLO ALOO NGMAMI KLƆUKLƆU Ɔ

Mawu we ɔ

¹ Yawɛ Tabohiatsɛ, i suɔ o we ɔ saminya!

² I na nɛ i ba lejɛ ɔ! Ye hɛ ngɛ jae ngɛ mo Yawɛ o we ɔ he. Imi nɔmlɔ ɔ tsuo i ngɛ lae kɛ bua jɔmi kɛ ngɛ Yawɛ yi jee.

³ Yawɛ Tabohiatsɛ, ye matsɛ, kɛ ye Mawu! Otokliihi, kɛ mawubitɛtehi po maa tsu ngɛ o bɔ sami la tɛ ɔ kasa nya, nɛ a lɛɛ a bimɛ ngɛ lejɛ ɔ.

⁴ Nihi nɛ hii o we ɔ mi, nɛ laa daa kɛ jeɔ o yi ɔ, a gbaa mɛ.

⁵ Nihi nɛ naa a he wami kɛ jeɔ o mi, nɛ a hlaa kaa a maa hia blɔ kɛ ya Zion yo ɔ nɔ ɔ, a gbaa mɛ.

⁶ Ke a ya gu ya fomi kɔ̃ ɔ mi kɛ be kɛkɛ lejɛ ɔ plɛ pee pa nɛ gbiɛ nyu hyi lɛ tɔ.

⁷ Pɔ tɔɛ mɛ; mohu ɔ, a naa he wami he, nɛ a nyɛɛɔ kɛ ya suu Mawu hɛ mi tɔɔ ngɛ Zion.

⁸ Yawɛ Tabohiatsɛ Mawu, bu ye kue fami ɔ tue! Yakob Mawu, moo bu mi tue koo!

⁹ Mawu, wa kpa mo pɛɛ nɛ o gbaa wa matsɛ ɔ, nɔ nɛ mo nitsɛ o pɔ lɛ nu ɔ.

¹⁰ Ligbi kake nɛ nɔ ko maa ye ngɛ o we ɔ hi pe ligbi akpe nɛ e maa ye ngɛ he kpa ko. Ma suɔ nɛ ma pee agbo nya bulɔ ngɛ ye Mawu ɔ we ɔ mohu, pe kaa ma hi yayami peeli a we mi.

¹¹ Yawɛ Mawu ji wa pu kɛ wa tsɛ̃i. E naa wɔ mɔbɔ, nɛ e woɔ wa hɛ mi nyami. Nihi nɛ peeɔ nɔ́ nɛ da a, e ha we nɛ nɔ́ ko hiaa mɛ.

¹² Yawɛ Tabohiatsɛ lee, nihi nɛ ngɔɔ a hɛ kɛ fɔɔ o nɔ ɔ, a gbaa mɛ!