La 83 - BAIBLO ALOO NGMAMI KLƆUKLƆU Ɔ

Kue fami ngɛ ma a he hiami be mi

¹ Mawu, ko ma o nya; koo pee dii, koo pee kɔ̃!

² Hyɛ, o he nyɛli ɔmɛ ngɛ basabasa pee; nihi nɛ sume mo ɔ tsɔ o hɛ mi atuã.

³ A ngɛ ga yaya toe kɛ ngɛ o ma a he woe; nihi nɛ o ngɛ a he bue ɔ, o he nyɛli ɔmɛ ngɛ a yi nɔ soe.

⁴ A ngɛ dee ke, “Nyɛ ha nɛ wa kpata ma a hɛ mi, konɛ biɛ Israel ɔ, nɔ ko kó kai hu.”

⁵ Ee, a pee kake kɛ wo o he; mɛ tsuo a so kɛ wo o he:

⁶ Edom bi, kɛ Ishmael bi; Moab bi, kɛ Hagrit bi;

⁷ Gebal bi, Amon bi, Amalek bi, Filistia bi, kɛ Tiro bi.

⁸ Asiria hu ba piɛ a he. Lot bimɛ ɔmɛ a kɔni nguaa kake ji mɛ.

⁹ Pee mɛ kaa bɔ nɛ o pee Midian bi ɔmɛ. Pee mɛ kaa bɔ nɛ o pee Sisera kɛ Yabin ngɛ Kishon pa a nya a.

¹⁰ O kpata a hɛ mi ngɛ Endor, nɛ a gbogboe ɔmɛ sa ngɛ zugba.

¹¹ Pee a we odehe ɔmɛ kaa bɔ nɛ o pee Oreb kɛ Zeeb ɔ. A ganɔ ɔmɛ hu, pee mɛ kaa bɔ nɛ o pee Zeba kɛ Zalmuna a.

¹² Mɛ lɛ a de ke, “Nyɛ ha waa ngɔ Mawu zugba a kɛ pee wa nɔ.”

¹³ Ye Mawu, gbɛɛ mɛ ngɔ fĩa kaa bunyuku nɛ lasiogblee muɔ kɛ bee, aloo jakati nɛ kɔɔhiɔ sɛ mi.

¹⁴ Kaa bɔ nɛ la sãã hue, nɛ la lilɛ haa yokuhi sãã a,

¹⁵ nyɛɛ a se ja nɔuu kɛ o we ahumi ɔ, nɛ o ngɔ o kɔɔhiɔ nɛ nya wa a kɛ wo a he gbeye.

¹⁶ Yawɛ, ha nɛ zo nɛ gbe mɛ kpɔtɔɔ kɛ yaa si a maa na o he wami kpetekpleenyɛ ɔ.

¹⁷ Ha nɛ a hɛ mi nɛ pue si nɛ a ye gbeye daa. Ha nɛ a hao, nɛ a hɛ mi nɛ kpata,

¹⁸ konɛ a le kaa mo Yawɛ, mo nɔ kake too lɛ o ngɛ he wami pe nɔ tsuaa nɔ ngɛ je ɔ mi tsuo.