La 82 - BAIBLO ALOO NGMAMI KLƆUKLƆU Ɔ

Mawu, matsɛ kpetekpleenyɛ

¹ Mawu daa si ngɛ hiɔwe gua nguaa a mi. E ngɛ kojoli ɔmɛ a hɛ mi kae ke,

² “Kɛ yaa si mɛni be lɛ nyɛ maa hyɛ nimli a hɛ mi kɛ kojo? Kɛ yaa si mɛni be lɛ nyɛ ma fi nimli yayamihi a se?

³ Nyɛɛ ye ohiatsɛmɛ, kɛ awusahi a sane ha mɛ. Nyɛɛ tu munyu ha nɔ́ nali, kɛ ni nɛmɛ nɛ be nɔ́ ko.

⁴ Nyɛ je ohiatsɛmɛ, kɛ nihi nɛ e fi mɛ ɔ kɛ je nimli yayamihi a dɛ mi.

⁵ “Nyɛ li nɔ́ ko nɔ́ ko fɛɛ! Nyɛ be juɛmi! Diblii mi kɛkɛ lɛ nyɛ ngɛ nyɛɛe. Dami sane yemi se po ngɛ je ɔ mi.

⁶ I ke, ‘Mawuhi ji nyɛ; nyɛ tsuo Hiɔwe No ɔ bimɛ ji nyɛ.’

⁷ Se nyɛ ma gbo kaa bɔ nɛ nimili adesahi tsuo gboɔ ɔ. Nyɛ wami se maa po kaa bɔ nɛ ganɔhi hu a wami se poɔ ɔ.”

⁸ Mawu, ba nɛ o ba kojo je ɔ, ejakaa je ma amɛ tsuo o níhi ji mɛ.