La 81 - BAIBLO ALOO NGMAMI KLƆUKLƆU Ɔ

Nyami la

¹ Nyɛ wo nyɛ gbi nɔ kɛ la ha Mawu, wa he bulɔ ɔ. Nyɛ hwɔ lele kɛ je Yakob Mawu ɔ yi.

² Nyɛ je la, nɛ nyɛɛ fia gɔgɔ. Nyɛɛ fia saku nɛ gbi ngɔɔ, nɛ nyɛɛ fia miɛ kɛ piɛ he.

³ Nyɛ kpa titimati wa nyami ligbi ɔmɛ tsuo, be mi nɛ nyɔhiɔ da, kɛ be mi nɛ nyɔhiɔ ɔ wa.

⁴ Mlaa nɛ ngɛ Israel ji nɛ ɔ nɛ; Yakob Mawu ɔ lɛ wo.

⁵ Mawu wo Israel bi ɔmɛ mlaa nɛ ɔ, benɛ e ya puɛ ní ngɛ Egipt zugba a nɔ ɔ. I nu nɛ nɔ ko nɛ i li lɛ ngɛ dee ke,

⁶ “I je nyɛ tlomi ɔmɛ kɛ je nyɛ nɔ; i ha nɛ nyɛ ngmɛɛ nyɛ kusii ɔmɛ a he.

⁷ Benɛ nyɛ ngɛ haomi mi ɔ, nyɛ tsɛ mi. I he nɔ kɛ je ye laami he ɔ, he nɛ hiɔwe siɔ kɛ jee ɔ, nɛ i he nyɛ yi wami. Jehanɛ se hu, i ka nyɛ ngɛ Meriba nyu ɔ he.

⁸ Ye ma, nyɛɛ bu tue nɛ ma wo nyɛ ga. Israel bi, i na nɛ nyɛ bu mi tue!

⁹ Nyɛ ko ha nɛ a na mawu kpahi ngɛ nyɛ kpɛti; nyɛ ko ja ma se mawuhi.

¹⁰ Imi ji Yawɛ, nyɛ Mawu ɔ, nɔ nɛ je nyɛ kɛ je Egipt zugba a nɔ ɔ nɛ. Nyɛɛ pa nyɛ nya mi hatoo, nɛ ma lɛ nyɛ.

¹¹ “Se ye ma a bui mi tue; Israel bi ɔmɛ bui mi.

¹² Enɛ ɔ he je ɔ, i ngmɛɛ a je mi he ngɔ ha mɛ, konɛ a pee nɔ́ nɛ mɛ nitsɛmɛ a tsui suɔ.

¹³ I na nɛ ye ma a bu mi tue; i na nɛ Israel bi ɔmɛ nyɛɛ ye se!

¹⁴ Jinɛ i ba a he nyɛli ɔmɛ si momoomo; jinɛ i kpata a hɛ mi kɛ.

¹⁵ Jinɛ ni nɛmɛ nɛ sume imi, Yawɛ ɔ, a kpla si ngɛ ye hɛ mi, nɛ a ngɛ a tue gblae kɛ yaa neneene.

¹⁶ Se nyɛɛ lɛɛ ma lɛ nyɛ kɛ ngma kpakpa. Ma ha nyɛ hwo babauu kɛ je tɛ sa mi nɛ nyɛ maa ye.”