La 80 - BAIBLO ALOO NGMAMI KLƆUKLƆU Ɔ

Kue fami kɛ ha ma a si tomi ekohu

¹ Israel to hyɛlɔ, mo nɛ o nyɛɛɔ Israel hɛ mi kaa bɔ nɛ to hyɛlɔ tsɔɔ to ɔ, moo bu wɔ tue koo! Mo nɛ o hii si ngɛ hɛ kali a nɔ ɔ,

² je o he kpo kɛ tsɔɔ Efraim, Benyamin, kɛ Manase wɛtso ɔmɛ. Je o he wami ɔ kɛ tsɔɔ wɔ; ba nɛ o ba he wa yi wami!

³ Mawu, kpale wɔ kɛ ba o ngɔ ekohu. Naa wɔ mɔbɔ, konɛ wa yi nɛ na wami.

⁴ Yawɛ Tabohiatsɛ Mawu! O ma mi bi ɔmɛ a kue fami ɔ maa wo o mi mi la kɛ yaa si mɛni be?

⁵ Ngma nɛ o haa wɔ nɛ wa yeɔ wa tɔɔ, kɛ nyu hu nɛ wa nuɔ kɛkɛ ji vo nyu.

⁶ Je mahi nɛ bɔle wɔ ɔ, o haa nɛ a kɛ wɔ ba pleeɔ wa zugba a he, nɛ wa he nyɛli ɔmɛ muɔɔ wɔ bɔ nɛ a suɔ.

⁷ Mawu Tabohiatsɛ, kpale wɔ kɛ ba o ngɔ ekohu. Naa wɔ mɔbɔ, konɛ wa yi nɛ na wami.

⁸ O ngɔ wai tso kɛ je Egipt kɛ ba. O fie je ma amɛ kɛ je a zugba a nɔ, nɛ o ma wai tso ɔ ngɛ lejɛ ɔ.

⁹ O dla zugba a saminyayoo; o ha nɛ tso ɔ tsɛ̃ sipoku kɛ ya zu mi tsitsaa, nɛ wai tso ɔ ha zugba a nɔ tsuo.

¹⁰ E hɔ̃ ɔ ha yo ɔmɛ a nɔ, nɛ e kɔni ɔmɛ hu ha seda tso nguangua amɛ a nɔ.

¹¹ E gba kɔni kɛ ya na Mediterenia wo ɔ, ee, kɛ ya su Yufrate pa a he tɔɔ.

¹² Mɛni he je mɔ lɛ o gbɛ piɛ ɔ ngɛ e he? Amlɔ nɛ ɔ, nɔ tsuaa nɔ nɛ bee ngɛ lejɛ ɔ gbaa ya tsɔɔ wai yiblii ɔ eko.

¹³ Nga mi kpotoohi ngɛ wai yiblii ɔ hɛ mi kpatae, nɛ pu mi lohwehi tsuo ngɛ yee.

¹⁴ Mawu Tabohiatsɛ! Wa kpa mo pɛɛ nɛ o kpale kɛ ba wa ngɔ ekohu. Moo ma o yi si ngɛ hiɔwe, nɛ o hyɛ! Moo hyɛ wai tso bɔbɔyoo nɛ ɔ.

¹⁵ Wai tso bɔbɔyoo ɔ nɛ mo nitsɛ o ma, nɛ o hyɛ nɔ saminya kɛ ya si e bɔ kikɛ nɛ ɔ, ba nɛ o ba he e yi wami.

¹⁶ Wa he nyɛli ɔmɛ mɛ wai tso ɔ he la nɛ a po lɛ ngɔ fɔ si. O mi mi nɛ fu mɛ, nɛ o kpata a hɛ mi.

¹⁷ Ma nɛ mo nitsɛ o je blɔ hla mɛ, nɛ o ha nɛ a he wa kikɛ nɛ ɔ, moo bu a he, nɛ o baa a yi.

¹⁸ Wa be o se jee hu kɔkɔɔkɔ. Ha nɛ wa yi nɛ na wami, nɛ wa ma je o yi daa.

¹⁹ Yawɛ Tabohiatsɛ Mawu! Moo kpale wɔ kɛ ba o ngɔ ekohu. Naa wɔ mɔbɔ, konɛ wa yi nɛ na wami!