La 77 - BAIBLO ALOO NGMAMI KLƆUKLƆU Ɔ

Bua womi ngɛ haomi be mi

¹ I fa kue boboobo ha Mawu; i fa kue ha Mawu, nɛ e nu ye gbi.

² Benɛ i ngɛ haomi mi ɔ, i hla Nyɔmtsɛ se blɔ. Nyɔ mi ɔ, i wo ye nine nɔ kɛ ya hiɔwe, nɛ i sɔle nɛ ye kɔni gbo we. I na we bua jɔmi ko kulaa.

³ Benɛ ye hɛ ba Mawu nɔ, nɛ i bɔni ye yi mi susumi ɔ, ye susuma hao, nɛ i fa huu.

⁴ Nyɔ ɔ mi tsuo i hwɔ we mahe, kikɛ nɛ ɔ ye hɛngmɛ fɔɔ si paa. I hao tsɔ, nɛ i nyɛ we ma tu munyu.

⁵ Ye juɛmi ya su blema lokoo, nɛ i kai jehahi nɛ be kɛ ho.

⁶ Nyɔ mi tsuo i susu ye yi mi wawɛɛ nitsɛ, nɛ ye susuma pee vii. I de ngɛ ye yi mi ke,

⁷ “Anɛ Nyɔmtsɛ ɔ ma kua wɔ daa nɛ lo? Anɛ e pa be wa he bua jɔmi nae hu lo?

⁸ Anɛ e mɔbɔ nami ɔ se po jehanɛ lo? Anɛ e pa be e si womi ɔmɛ a nɔ yee hu lo?

⁹ Anɛ Mawu hɛ je nɔ kaa e maa na mɔbɔ lo? Anɛ jehanɛ lɛɛ abofu ba da mɔbɔ nami nane mi lo?”

¹⁰ Kɛkɛ nɛ i kɛ hɛdɔ bi ke, “Anɛ Mawu hiɔ nine ɔ tsu we ní hu lo? Anɛ Hiɔwe No ɔ pa be he wami ko hu lo?”

¹¹ Se kɛ̃, Yawɛ, i kai níhi nɛ o tsu blema a; ee, i kai nyakpɛ ní nguahi nɛ o pee ɔ.

¹² Ma susu níhi tsuo nɛ o pee ɔ a he; nyakpɛ níhi nɛ o pee blema a, ma kai.

¹³ Mawu, o níhi tsuo ngɛ klɔuklɔu! Te Mawu nɔ́ nɛ pa kle kaa mo, wa Mawu ɔ nɛ?

¹⁴ Mawu nɛ tsuɔ nyakpɛ ní ji mo; o je o he wami kpo ngɔ tsɔɔ je ɔ tsuo.

¹⁵ O ngɔ o he wami ɔ kɛ he o ma a yi wami; ee, o he Yakob kɛ Yosef a bimɛ ɔmɛ a yi wami.

¹⁶ Mawu, benɛ pa a na mo ɔ, e ye gbeye, nɛ wo ɔ sisi mimiɛ.

¹⁷ Hiɔmi nɛ kɛ je bɔku ɔmɛ a mi pue si. Hiɔwe si, nɛ oslabai gba kɛ bɔle si.

¹⁸ Hiɔwe si kplala-la-la kɛ po si kaa lasiogblee nɛ bee. Oslabai la a ha nɛ je ɔ mi pee heii, nɛ zugba a mimiɛ.

¹⁹ O nyɛɛ kɛ gu wo ɔ mi; o po wo nɛ mi kuɔ ɔ kɛ be, se o nane mami he ɔmɛ lɛɛ nɔ ko nɔ ko li.

²⁰ O ngɔ Mose kɛ Aaron ngɔ to o ma a nya, nɛ o kpaka mɛ kaa to hyɛlɔ tsɔɔ to.