La 75 - BAIBLO ALOO NGMAMI KLƆUKLƆU Ɔ

Mawu ji kojolɔ

¹ Mawu lee, wa naa mo si. Wa naa mo si! Wa ngɛ o biɛ ta woe, nɛ wa ngɛ nyakpɛ níhi nɛ o pee ɔ jajee.

² Mawu ke, “I to be nɛ ma kojo je ɔ; ke be ɔ su ɔ, ma ye dami sane.

³ Je ɔ kɛ e mi níhi tsuo ma mimiɛ; se imi ma ha je ɔ sisi tomi ɔmɛ maa ma si kpɛii.

⁴ I ngɛ he nɔ woli dee ke, ‘Nyɛ ko fĩa!’ I ngɛ yiwutsotsɛmɛ dee ke, ‘Nyɛ ko wo nyɛ he nɔ!’

⁵ Nyɛ ko wo nyɛ he nɔ kɛ si Hiɔwe No ɔ; nyɛ ko wo nyɛ kuɛ nɔ kɛ tu he nɔ womi munyu.”

⁶ Ejakaa, ke a ma ha nɔ ko blɔ nya, aloo a ma wo e nɔ ɔ, he wami nɛ ɔ, pi beleku je, loo bonyoku je, loo omleyi je nɛ e je.

⁷ Mawu ji kojolɔ; e woɔ ni komɛ a nɔ, nɛ e baa ni komɛ si.

⁸ Yawɛ hɛɛ kplu ko ngɛ e dɛ mi, nɛ dã kpakpa nɛ nya wa hyi lɛ tɔ. E maa po dã nɛ ɔ ha nimli yayamihi tsuo, nɛ a maa hi nue hluu kɛ yaa si dã a sisi tɔɔ.

⁹ Se imi lɛɛ ma ye Yakob Mawu ɔ he odase kɛ maa ya neneene; ma la kɛ je e yi daa.

¹⁰ E maa ba nimli yayamihi a he wami ɔ si; se nimli kpakpahi lɛɛ e ma ha nɛ a na he wami kɛ bɔ he.