La 74 - BAIBLO ALOO NGMAMI KLƆUKLƆU Ɔ

Ma a fa kue ha Mawu

¹ Mawu, mɛni he je lɛ o hɛ wɔ ngɔ fɔ he ɔ? Anɛ o mi mi ma fu mo nitsɛ o ma a daa kikɛ nɛ ɔ lo?

² Mo kai mo nitsɛ o ma nɛ o he kɛ je blema lokoo ɔ. Mo kai nihi nɛ o je kɛ je nyɔguɛ si himi mi, nɛ o pee mɛ mo nitsɛ o ma a. Mo kai Zion yo ɔ, he nɛ o hi sa a.

³ Moo nyɛɛ kɛ ya he nɛ plɛ pee we doku ɔ; he nyɛli ɔmɛ kpata níhi tsuo a hɛ mi ngɛ o we ɔ.

⁴ O he nyɛli ɔmɛ ya he ose ngɛ o he klɔuklɔu ɔ. A ngɔ a we aflangaa amɛ ya to lejɛ ɔ kɛ tsɔɔ kaa a ye kunimi.

⁵ A ngɛ kaa ni komɛ nɛ ngɔ gbiɛ kɛ ngɛ tso hɛɛe ngɛ pu mi.

⁶ A ngɔ gbiɛ kɛ hamle kɛ ku tsohi nɛ a kpɛ ɔ tsuo a mi dukuduku.

⁷ A hule o we klɔuklɔu ɔ, nɛ a mɛ he la. He nɛ a jaa mo ngɛ ɔ, a ble lejɛ ɔ.

⁸ A to kaa a ma kpata wa hɛ mi pɛsɛpɛsɛ. Zugba a nɔ hehi nɛ a kpee ngɛ nɛ a jaa Mawu ɔ, a mɛ lɛ tsuo he la.

⁹ Wa pa nɛ okadi ko hu; gbalɔ ko gbalɔ ko be hu. Nɔ ko nɔ ko hu li be nɛ nɔ́ nɛ ɔ se maa po.

¹⁰ Mawu, kɛ yaa si mɛni be lɛ wa he nyɛli ɔmɛ maa muɔ mo? Anɛ a maa gbe o biɛ ɔ he guɛ kɛ maa ya neneene lo?

¹¹ Mɛni he je lɛ o bɛ nɛ o ba piɛ wa he? Mɛni he je lɛ o bua o nine nya?

¹² Se Mawu, kɛ je blema lokoo ɔ, mo ji wa matsɛ; o he wa yi wami be babauu.

¹³ O kɛ o he wami kpetekpleenyɛ ɔ gba wo ɔ mi, nɛ o ywia wo mi lohwe gbeyegbeye ɔmɛ a yi.

¹⁴ Lohwe ɔ nɛ a tsɛɛ Leviatan ɔ, mo lɛ o ywia e yi, nɛ o ngɔ e he lo ɔ ngɔ ha nga nɔ lohwehi nɛ a ye.

¹⁵ O ha nɛ pa tsɔwitsɔwihi hia kɛ be, nɛ pa nguahi lɛɛ a mi nyu mii ta.

¹⁶ Mo lɛ o bɔ nyɔ kɛ pia, nɛ o ngɔ pu kɛ hlami ngɔ to a blɔ hehi.

¹⁷ Mo lɛ o to huzu kɛ ha je ɔ; o pee latsa be kɛ fĩɛ be.

¹⁸ Se Yawɛ mo kai kaa o he nyɛli ɔmɛ muɔɔ mo; nimli nɛ li Mawu ngɛ o biɛ he guɛ gbee.

¹⁹ Koo ngmɛɛ o ma nɛ a ní ngɛ mɔbɔ ɔ he kɛ ha a he nyɛli yiwutsotsɛmɛ ɔmɛ. O ma nɛ a ngɛ yi mi wae ɔ, o hɛ ko je a nɔ.

²⁰ Mo kai somi nɛ o kɛ wɔ so ɔ. Zugba a nɔ hehi nɛ wo diblii ɔ, yi wu tso níhi lɛ a peeɔ ngɛ lejɛ ɔmɛ.

²¹ Nihi nɛ a ngɛ mɛ yi mi wae ɔ, ko ha zo nɛ gbe mɛ. Ha nɛ nɔ́ nali, kɛ ohiatsɛmɛ tsuo nɛ a je o yi.

²² Mawu, wo o he nɔ nɛ o kɛ wa he nyɛli ɔmɛ nɛ to ní. Mo kai kaa nihi nɛ li mo Mawu ɔ, a yeɔ o he fɛu daa nɛ.

²³ Munyuhi nɛ o he nyɛli ɔmɛ tuɔ kɛ siɔ mo ɔ, o hɛ ko je nɔ. Nihi nɛ teɔ si kɛ woɔ mo ɔ, ngmlaa nɛ a kpaa kɛ woɔ o yi ɔ, daa nɛ ɔ, pe ngmlaa a ngɛ nɔ yae.