La 72 - BAIBLO ALOO NGMAMI KLƆUKLƆU Ɔ

A fa kue ha matsɛ

¹ Mawu, ngɔɔ o dami sane yemi mumi kɛ wo matsɛ ɔ mi, konɛ o bi, odehe ɔ nɛ kojo pɛpɛɛpɛ!

² É ngɔ dami sane yemi kɛ hyɛ o ma a nɔ; nɛ é ye nɔ́ nali a sane ha mɛ!

³ Zugba a nɛ ba ní saminya, nɛ á ye dami sane ngɛ he tsuaa he.

⁴ Matsɛ ɔ nɛ ye ohiatsɛmɛ a sane ha mɛ. E piɛ dɛgutsɛmɛ a he, se yiwutsotsɛmɛ lɛɛ e kɛ mɛ nɛ to ní.

⁵ Be abɔ nɛ pu kɛ nyɔhiɔ ngɛ nɛ ɔ, ha nɛ matsɛ ɔ yi nɛ na wami kɛ ya neneene.

⁶ Ha nɛ matsɛ ɔ yi nɔ nɛ jɔ kaa hiɔmi nɛ nɛɛ pueɔ ngmɔ nɔ nɛ haa zugba a nyu ɔ.

⁷ Á ye dami sane saminya ngɛ e yi nɔ; e yi nɔ nɛ jɔ kulaa ngɛ he tsuaa he hluu kɛ yaa su be nɛ nyɔhiɔ be hu!

⁸ É ye tsɛ kɛ je wo nya hiɛ kɛ ya su wo nya hiɛ, kɛ je Yufrate pa a nya kɛ ya su je ɔ nyagbe he ɔmɛ!

⁹ Nga kplanaa a nɔ bi ɔmɛ nɛ a ba kpla si ngɛ e hɛ mi, nɛ e he nyɛli ɔmɛ nɛ a ngɔ a hɛ mi kɛ bu si.

¹⁰ Matsɛmɛ nɛ je Spania, kɛ zugbahi nɛ wo bɔle mɛ ɔ a nɔ ɔ, á tsu to kɛ ba ha lɛ, nɛ Sheba, kɛ Seba matsɛmɛ ɔmɛ nɛ a ba ke lɛ ní!

¹¹ Matsɛmɛ ɔmɛ tsuo nɛ a ba kpla si ngɛ e hɛ mi, nɛ je ma amɛ tsuo nɛ a sɔmɔ lɛ!

¹² Ke ohiatsɛ, loo nɔ nɛ e fi lɛ, loo nɔ nɛ be nɔ ko tsɛ lɛ ɔ, e buɔ lɛ tue.

¹³ Nihi nɛ gbɔjɔ, kɛ nihi nɛ e fi mɛ ɔ, e naa mɛ mɔbɔ. Nihi nɛ e fi mɛ ɔ, e heɔ a yi wami.

¹⁴ E heɔ a yi wami kɛ jeɔ yi mi wami, kɛ awi yemi mi; ejakaa nɔ tsuaa nɔ muɔ he jua wa ngɛ e hɛ mi.

¹⁵ Matsɛ ɔ yi nɛ na wami! Á ngɔ Arabia sika tsu kɛ ba ha lɛ! A kpa Mawu pɛɛ kɛ ha lɛ be tsuaa be, nɛ a bi gbaami ha lɛ daa ligbi!

¹⁶ Zugba a nɛ ba ní saminya, nɛ a na blɛfo babauu ngɛ yo ɔmɛ tsuo pɛpɛɛpɛ a nɔ. Á na tso yiblii saminya kaa bɔ nɛ a naa ngɛ Lebanon ɔ. Ma amɛ a mi nɛ hyi tɔ kɛ nimli adesahi kaa nga.

¹⁷ Matsɛ ɔ biɛ nɛ hi si kɛ ya neneene. E biɛ nɛ pɛ be abɔ nɛ pu ngɛ nɛ ɔ. Mawu nɛ gbaa je ma amɛ tsuo, nɛ a ha matsɛ ɔ bua jɔmi.

¹⁸ A je Yawɛ, Israel Mawu ɔ yi; lɛ nɔ kake too lɛ e peeɔ nyakpɛ níhi!

¹⁹ A je e biɛ klɔuklɔu ɔ yi kɛ ya neneene! A wo e hɛ mi nyami ngɛ je ɔ mi tsuo! Amen! Amen!

²⁰ David, Isai bi ɔ kue fami ɔmɛ a nyagbe ji nɛ ɔ nɛ.