La 71 - BAIBLO ALOO NGMAMI KLƆUKLƆU ƆNɔmo ko kue fami 1 Yawɛ, o ngɔ nɛ i ba sa we ngɛ nɛ ɔ nɛ; ko ha nɛ ye hɛ mi nɛ pue si kɔkɔɔkɔ. 2 Akɛnɛ dalɔ ji mo he je ɔ, je mi kɛ je haomi mi; kpɔ mi kɛ je he nyɛli a dɛ mi. I kpa mo pɛɛ, bu mi tue, nɛ o he ye yi wami. 3 Ye wesa he, kɛ ye he falɔ, moo bu ye he daa kaa tɛ sa, kɛ mɔ nɛ he wa. 4 Ye Mawu, mo kpɔ mi kɛ je yiwutsotsɛmɛ a dɛ mi; mo he mi kɛ je yayami peeli, kɛ yi mi wali a dɛ mi. 5 Nyɔmtsɛ, i ngɔ ye hɛ kɛ fɔ o nɔ. Yawɛ, kɛ je ye nihe mi tɔɔ ɔ, mo, o nɔ i ngɔ ye hɛ kɛ fɔ. 6 Kɛ je be nɛ a fɔ mi ɔ, mo, o nɔ i ngɔ ye hɛ kɛ fɔ. Mo lɛ o je mi kpo kɛ je ye nyɛ mi mi tɔɔ. Ma je o yi daa. 7 Mo ji ye wesa he nɛ he wa; enɛ ɔ he je ɔ, i ba pee nɔ hyɛmi nɔ́ kɛ ha nihi babauu. 8 Ma je o yi, nɛ ma wo o hɛ mi nyami ligbi ɔ tsuo. 9 Ko sake mi kɛ fɔ he ngɛ ye bwɔmi mi, be nɛ ye he wami ta nɛ ɔ. 10 Ye he nyɛli ɔmɛ tuɔ ye he munyu yaya, a ya kpee nɛ a soɔ ye yi nɔ; 11 a deɔ ke, “Mawu je e se; waa fie lɛ nɛ waa nu lɛ, ejakaa nɔ ko nɔ ko be nɛ ma kpɔ lɛ ngɛ wa dɛ.” 12 Mawu, ko ha nɛ i kɛ mo wa kpɛti nɛ kɛ. Ye Mawu, pee esɔ nɛ o ba piɛ ye he! 13 Ha nɛ zo nɛ gbe ye he nyɛli ɔmɛ, nɛ a hɛ mi nɛ kpata pɛsɛpɛsɛ. Nihi nɛ a ngɛ hlae nɛ a pee mi yayami ɔ, ha nɛ zo nɛ gbe mɛ, nɛ ahlua hu nɛ bɔ mɛ. 14 Se imi lɛɛ ma ngɔ ye hɛ kɛ fɔ o nɔ be tsuaa be. Ma je o yi daa kɛ daa. 15 Ligbi mluku ɔ tsuo ma wo o ta kaa o yeɔ dami sane; ma de daa ke yi wami helɔ ji mo. Pohu níhi nɛ o peeɔ ɔ hiɛ babauu pe bɔ nɛ ye juɛmi maa su he hulɔ. 16 He wami ní nguanguahi nɛ mo, Nyɔmtsɛ Yawɛ o tsu ɔ, ma gba kɛ tsɔɔ. Ma je o yi ke mo pɛ lɛ o peeɔ nɔ́ nɛ da. 17 Mawu, kɛ je ye nihe mi tɔɔ nɛ o tsɔɔ mi ní, nɛ amlɔ nɛ ɔ hu i ngɛ o nyakpɛ ní tsumi ɔmɛ a he odase yee. 18 Lɔ ɔ he ɔ, amlɔ nɛ ɔ nɛ i bwɔ, nɛ ye yi mi hiɛ futaa kɛ mua a, Mawu, ko kua mi! O kɛ mi nɛ hi si kɛ yaa si ma sɛɛ nyakpɛ ní nguanguahi nɛ o tsu ɔ kɛ ha yi nɔhi nɛ maa ba ngɛ se ɔ. 19 Mawu, bɔ nɛ o he wa, kɛ bɔ nɛ o yeɔ dami sane ɔ, nɔ ko nɔ ko be nyɛe maa kale. O tsu nyakpɛ níhi babauu. Mawu, mɛnɔ kɛ mo sɔ? 20 Mo lɛ o ha nɛ i na amanehlu babauu, mo nɔuu lɛ o ma ha ye yi ma na wami ekohu. O maa kpale mi kɛ je gbeje kɛ ba je mi ekohu. 21 O maa wo ye hɛ mi nyami babauu, nɛ o ma ha ye bua maa jɔ ekohu. 22 Mawu, imi hu ma fia kpa saku kɛ je o yi ngɛ anɔkuale nɛ o yeɔ daa a he. Ma la kɛ to saku ɔ he kɛ je o yi, kɛ je mo, Israel Nɔ Klɔuklɔu ɔ o yi. 23 Ma hwɔ lele, nɛ ma la kɛ je o yi; ma je o yi, ejakaa o he ye yi wami. 24 Ma ye odase daa ke o yeɔ dami sane. Ejakaa nihi nɛ hlaa kaa a maa gbe mi ɔ, zo gbe mɛ, nɛ ahlua hu bɔ mɛ. |
Bible in Dangme © Bible Society of Ghana, 2018.
Bible Society of Ghana