La 68 - BAIBLO ALOO NGMAMI KLƆUKLƆU Ɔ

Ma kunimi yemi la

¹ Mawu nɛ te si koo! Á gbɛ e he nyɛli ɔmɛ ngɔ fĩa koo! Nihi nɛ sume lɛ ɔ, ha nɛ a tu fo ngɛ e nya.

² Fie mɛ kɛ ya se lokoo kaa bɔ nɛ kɔɔhiɔ ngɔɔ la su ku kɛ yaa a. Yiwutsotsɛmɛ a hɛ mi nɛ kpata ngɛ Mawu hɛ mi kaa bɔ nɛ hwo gbaku sileɔ ngɛ la he ɔ.

³ Se nihi nɛ peeɔ nɔ nɛ da a, mɛɛ lɛɛ a nya, nɛ a la kɛ bua jɔmi ngɛ Mawu hɛ mi.

⁴ Nyɛ la ha Mawu; nyɛ la kɛ je e biɛ ɔ yi. Nɔ nɛ hii si ngɛ bɔku ɔmɛ a nɔ kɛ ngɛ nyɛɛe ɔ, nyɛ la kɛ je e yi. Yawɛ ji e biɛ; nyɛ la kɛ bua jɔmi ngɛ e hɛ mi.

⁵ Awusahi a tsɛ, kɛ yalɔyihi a he bulɔ ɔ, lɛ ji Mawu nɛ ngɛ e he klɔuklɔu ɔ nɛ.

⁶ Nihi nɛ nɔ ko be mɛ ɔ, Mawu haa mɛ we nɛ a hii mi. E jeɔ pamitsɛmɛ kɛ jeɔ tsu mi, nɛ e haa a bɔɔ. Se atuã tsɔli lɛɛ e haa a hii zugba gbogboe nɛ bɛ ní nɔ.

⁷ Mawu, be nɛ o nyɛɛ o ma a hɛ mi, be nɛ o kɛ mɛ gu nga kplanaa a nɔ ɔ,

⁸ mo Yawɛ Israel Mawu ɔ, o ha zugba mimiɛ, nɛ hiɔmi nɛ ngɛ mo Mawu ɔ o hɛ mi. Sinai yo ɔ tete mimiɛ ngɛ mo Mawu, Israel Mawu ɔ, o hɛ mi.

⁹ Mawu, o ha hiɔmi nɛ babaaba kɛ ha zugba a tsuo nɔ; kɛkɛ nɛ zugba nɛ gbo ɔ ba ní saminya ekohu.

¹⁰ O ha o ni ɔmɛ po ma ngɛ zugba a nɔ. Mawu, mɔbɔ nalɔ, o haa nɔ́ nali a hiami níhi.

¹¹ Nyɔmtsɛ ɔ wo gbi, nɛ nihi babauu ngɔ sɛ gbi ɔ kɛ ho ke,

¹² “Matsɛmɛ ɔmɛ, kɛ a tabo ɔmɛ tu fo oo! A tu fo kɛ je ta a nya oo!” Yihi nɛ a si ngɛ se ɔ dla ta yibu ní ɔ ha a he.

¹³ Mɛɛ lɛɛ to tsu ɔmɛ a kasa nya kɛkɛ a ngɛ, se a he pee fɛu kaa lahuɛhi nɛ sika hiɔ ha a he, kaa lahuɛ tsɛlihi kɛ a he sika tsu ngmingmiingmi.

¹⁴ Benɛ Mawu Ope ɔ gbɛ matsɛmɛ ɔmɛ ngɔ fĩa a, e pee kaa nɔ́ nɛ snoo ngɛ nɛe ngɛ Zalmon yo ɔ nɔ.

¹⁵ Mo Bashan yo, yo kpetekpleenyɛ, mo Bashan yo, yo gojogojoohi nɛ tsa!

¹⁶ Yo nɛ Mawu hla ha e he ɔ, mɛni he je nyɛ yo gojogojoohi nyɛ hɛ ngɛ e nɔ kɔ̃e? Ee, lejɛ ɔ Yawɛ maa hi kɛ maa ya neneene!

¹⁷ Nyɔmtsɛ ɔ kple si kɛ je Sinai yo ɔ nɔ kɛ ba e he klɔuklɔu ɔ. E kɛ e ta zugba lɛ babauu nitsɛ lɛ ba.

¹⁸ O kuɔ yo gagaa a, nɛ o kpaka nihi nɛ a nuu mɛ ta nyɔguɛ kɛ nyɛɛ o se yuu. O he nike ní kɛ je nimli adesahi tsuo a dɛ; o he ngɛ atuã tsɔli tete po a dɛ, konɛ mo Yawɛ ɔ o hi a kpɛti ngɛ lejɛ ɔ.

¹⁹ Nyɛ je Nyɔmtsɛ ɔ yi. Daa nɛ ɔ, e yeɔ wa sane haa wɔ. Lɛ Mawu ɔ nɔuu ji nɔ nɛ heɔ wa yi wami.

²⁰ Wa Mawu ɔ, Mawu nɛ heɔ nɔ yi wami ji lɛ; Nyɔmtsɛ Yawɛ ɔ, lɛ nɛ e jeɔ nɔ kɛ jeɔ gbenɔ mi.

²¹ Mawu maa ywia e he nyɛli ɔmɛ a yi; níhi nɛ ji yayami peeli a hɛ mi nyami ɔ, Mawu ma kpata lɔ ɔmɛ tsuo a hɛ mi.

²² Bɔ nɛ Nyɔmtsɛ ɔ ngɛ dee ji nɛ ɔ nɛ: “Ma kpaka mɛ kɛ je Bashan kɛ ba ekohu; ma je mɛ kɛ je wo ɔ sisi tɔɔ kɛ ba,

²³ konɛ o nane nɛ naa muɔ mi kɛ be, nɛ o gbe ɔmɛ hu a lilɛ nɛ na o he nyɛli ɔmɛ a he nɔ́ ko nɛ a lɔ.”

²⁴ Mawu, ni ɔmɛ tsuo na bɔ nɛ o je kpo kɛ agbo jemi. Ye Mawu, kɛ ye matsɛ, a na bɔ nɛ a to kɛ nyɛɛ o se yuu kɛ ba o we klɔuklɔu ɔ.

²⁵ Lali nyɛɛ hɛ mi, yihewi fao fiali nyɛɛ a se, nɛ saku fiali gbe nya. A ngɛ dee ke,

²⁶ “Nyɛ ma kpekpemi ɔ, nyɛ je Mawu yi! Nyɛ Yakob nina tsuo, nyɛ je Yawɛ yi!”

²⁷ Benyamin, wɛtso ɔmɛ a kpɛti wayoo pe kulaa a, lɛ nɛ nyɛɛ hɛ mi ha mɛ. Yuda ganɔ ɔmɛ, kɛ e we asafoatsɛmɛ ɔmɛ nyɛɛ se; Zebulun ganɔ ɔmɛ tsa nɔ, nɛ Naftali ganɔ ɔmɛ gbe nya.

²⁸ Mawu, je o he wami kpetekpleenyɛ ɔ kpo; he wami nɛ o kɛ tsu ní ha wɔ sa a, Mawu, ha nɛ a na.

²⁹ Yawɛ, o we ɔ nɛ ngɛ Yerusalem he je ɔ, matsɛmɛ ngɔɔ nike ní kɛ ba haa mo.

³⁰ Egipt, lohwe dikalɔ nɛ hii gla mi ɔ, ka e hɛ mi; je ma amɛ, na kuhi, kɛ a na bihi tsuo, ka a hɛ mi hluu kɛ yaa si mɛ tsuo a ma ba kpla si, nɛ a maa ngɔ a sika kɛ ba ha mo. Mahi nɛ ta pɛ a suɔ ɔ, gbɛɛ mɛ ngɔ fĩa.

³¹ Ha nɛ a ngɔ akɔblee kɛ je Egipt kɛ ba, nɛ Sudan bi a he nɛ sɔ kɛ wo a nine nɔ kɛ ha mo Mawu.

³² Nyɛ je nɛ ɔ mi matsɛ yemihi tsuo, nyɛ la kɛ ha Mawu. Nyɛ la kɛ je Nyɔmtsɛ ɔ yi;

³³ nɔ nɛ ngɛ hiɔwe lokoo kɛ je blema teteete ɔ, nyɛ je e yi. Nyɛɛ bu e gbi nguaa nɛ ngɛ pɛe hoo ɔ tue.

³⁴ Nyɛɛ fiɛ Mawu he wami ɔ; e ngɛ he wami ngɛ Israel nɔ; e ngɛ hiɔwe nɔ he wami hulɔ.

³⁵ Mawu, Israel Mawu ɔ he ngɛ gbeye ngɛ e hi he klɔuklɔu ɔ. E haa e ma a he wami, kɛ nyɛmi. A je Mawu yi.