La 66 - BAIBLO ALOO NGMAMI KLƆUKLƆU Ɔ

Yi jemi kɛ sina la

¹ Nyɛ je ɔ tsuo, nyɛ hwɔ lele kɛ je Mawu yi!

² Nyɛ la kɛ je e yi. Nyɛɛ wo e hɛ mi nyami saminya!

³ Nyɛ de Mawu ke, “Bɔ nɛ o peeɔ níhi ɔ ngɛ gbeye loo! O he wami kpetekpleenyɛ ɔ nya a, o he nyɛli ɔmɛ ba a he si ha mo.

⁴ Nihi tsuo nɛ ngɛ je ɔ mi jaa mo, a laa kɛ jeɔ o yi, a jeɔ o biɛ ɔ yi!”

⁵ Nyɛɛ ba, nyɛ ba hyɛ níhi nɛ Mawu pee, nyakpɛ níhi nɛ e tsu kɛ ha nimli adesahi.

⁶ E ha wo ɔ plɛ pee zugba gbigbli; nɛ nimli adesahi kɛ a nane po wo ɔ. Wa nyá ngɛ lejɛ ɔ ngɛ nɔ́ nɛ o pee ha wɔ ɔ he.

⁷ E ngɛ tsɛ yee kɛ he wami kɛ yaa neneene. E hɛngmɛ ngɛ je ma amɛ a he; atuã tsɔli kó wo a he nɔ.

⁸ Nyɛ je ma amɛ tsuo, nyɛ je wa Mawu ɔ yi! Nyɛ je e yi wawɛɛ nɛ a nu;

⁹ lɛ ji nɔ nɛ haa wa yi naa wami, nɛ e ha we nɛ waa sane nɔ si.

¹⁰ Mo Mawu, o ka wɔ hyɛ ha, o tsu wa he kaa bɔ nɛ a tsuɔ sika hiɔ he ɔ.

¹¹ O ngɔ wɔ ya wo klama mi, nɛ wa du. O ngɔ tlomi nɛ jiɔ ngɔ tloo wɔ.

¹² O ha wa he nyɛli ye wa nɔ; wa gu la mi, nɛ wa gu nyu mi hulɔ, se o je wɔ slɔkee kɛ ba he nɛ kplɔkɔtɔ ngɛ.

¹³ Ma ngɔ sami bɔ kɛ ba o we ɔ, ma ye ye siwo ɔmɛ a nɔ ha mo.

¹⁴ Níhi nɛ je ye nya nɛ i de be nɛ e fi mi ɔ, ma pee.

¹⁵ Ma ngɔ lohwe nɛ tu zɔ kɛ ba sã sami bɔ ha mo; ma sã agbosuhi ngɛ bɔ sami la tɛ ɔ nɔ. Na kuhi, kɛ apletsihi ma kɛ sã bɔ, konɛ a je la su ku kɛ ya hiɔwe.

¹⁶ Nyɛ nihi tsuo nɛ yee Mawu gbeye, nyɛɛ ba nɛ nyɛ ba bu tue, nɛ ma gba nyɛ nɔ́ nɛ e pee ha mi.

¹⁷ I kpa ngmlaa kɛ tsɛ lɛ; kɛkɛ nɛ i la kɛ je e yi.

¹⁸ Kaa pe i suɔ yayami, nɛ i ngɔ kɛ laa ngɛ ye tsui mi ɔ, Nyɔmtsɛ ɔ ko bui mi tue.

¹⁹ Se niinɛ, Mawu bu mi tue, e ta tue ha mi, nɛ e he ye kue fami ɔ nɔ.

²⁰ Ma je Mawu yi, ejakaa e sakee we ye kue fami ɔ kɛ fɔɛ e tue se; nɛ e ha we nɛ mɔbɔ nɛ e naa mi daa a se nɛ po.