La 65 - BAIBLO ALOO NGMAMI KLƆUKLƆU Ɔ

Yi jemi kɛ sina

¹ Mawu, e sa kaa a je o yi ngɛ Zion, nɛ sihi nɛ a wo mo ɔ, a ye nɔ.

² Ee, mo pɛ lɛ o buɔ kue fami tue. O ngɔ adesahi tsuo maa ba,

³ nɛ a ba bu akɔtaa ngɛ a yayami ɔmɛ a he. Ke wa he yayami ɔmɛ ngɛ wɔ haoe ɔ, mo lɛ o kɛ paa wɔ.

⁴ A gbaa nɔ tsuaa nɔ nɛ mo nitsɛ o hla lɛ, nɛ o ngɔ lɛ kɛ ba o we ɔ. Wa ma na ní kpakpahi nɛ ngɛ o we klɔuklɔu ɔ a he bua jɔmi. O bu wa kue fami ɔ tue.

⁵ O pee ní gbeyegbeyehi kɛ he wa yi wami. Niinɛ, Mawu, mo ji wa yi wami helɔ. Nihi tsuo nɛ ngɛ je ɔ mi he tsuaa he, zugba a nyagbe he ɔmɛ, kɛ wo se tsitsaa lokoo ɔ tsuo, mo o nɔ a ngɔ a hɛ kɛ fɔ.

⁶ Mo nɔuu nɛ o ngɔ yo gojogojoo ɔmɛ ngɔ ma si kpɛii ngɛ o he wami kpetekpleenyɛ ɔ nya.

⁷ Ke wo gli, nɛ oslɔke ɔmɛ pee hamahama a, mo lɛ o jɔɔ a he lɛ a peeɔ dii kulaa. Nimli adesahi nɛ ngɛ basabasa hu mo nɔuu lɛ o jɔɔ a he.

⁸ Enɛ ɔ he je ɔ, nyakpɛ níhi nɛ o pee ɔ, ha je ɔ tsuo ngɛ gbeye yee. A hwɔɔ lele kɛ jeɔ zugba a nyagbe he kake kɛ ya siɔ nyagbe he kake.

⁹ O slaa zugba a, o haa lɛ nyu, nɛ e baa ní babauu. Ke o ha pa a hyi kikɛ nɛ ɔ, ngmɔ ɔmɛ baa ní saminya. Bɔ nɛ o peeɔ lɛ ha ji nɛ ɔ nɛ.

¹⁰ O haa hiɔmi nɛɛ babauu kɛ pueɔ ngmɔ ɔmɛ nɛ a hu ɔ mi. Ngmɔ ɔmɛ tsuo a mi hyiɔ kɛ nyu ɔ. Zu ɔ mi jɔɔ ha ní ɔmɛ nɛ a du ɔ, nɛ o haa ní ɔmɛ baa saminya.

¹¹ O ha ní kpakpahi babauu baa ngɛ jeha a mi. He tsuaa he nɛ o be ngɛ ɔ kɛkɛ ní ba babauu.

¹² Lohwehi babauu ngɛ lohwe lɛmi he ɔmɛ ngɛ nga a nɔ.

¹³ Nga a nɔ pee fɛu kɛ tohi babauu, nɛ dɔ ɔmɛ a mi hyi kpɛkpɛɛkpɛ kɛ blɛfo; nɔ́ tsuaa nɔ́ ngɛ lele hwɔe, nɛ a ngɛ lae kɛ bua jɔmi.