La 64 - BAIBLO ALOO NGMAMI KLƆUKLƆU Ɔ

Kue fami kɛ ha he bumi

¹ Mawu lee, moo bu mi tue; hyɛ kaa i sɛ haomi mi! Ba he ye yi wami; ba kpɔ mi kɛ je ye he nyɛli a dɛ mi.

² Yiwutsotsɛmɛ ngɛ ye yi nɔ soe. Kpɔ mi kɛ je yayami peeli babauu ɔ a dɛ mi.

³ A duɔ a lilɛhi a nya kaa klaate; a munyu yaya amɛ ngɛ kaa kɛ̃ɛ̃ mi bihi

⁴ nɛ a kɛ tsɛ̃ɔ nɔ ko nɛ pee we yayami ko ngɛ diblii mi. A tsɛ̃ɔ lɛ tlukaa, nɛ a yi gbeye.

⁵ A peeɔ yi wu tso ní nɛ ɔmɛ ngɛ laami mi; a tsɔɔ klamahi babauu; a woɔ a sibi he wami, nɛ a deɔ ke, “Mɛnɔ maa na wɔ?”

⁶ A toɔ ga, konɛ a kɛ pee nɔ yayami, nɛ a deɔ ke, “Mɛnɔ ma nyɛ ma kpa wa ga nɛ ɔ si? Wa gbe nya! Wa to ga nɛ nɔ be!” Nɔmlɔ adesa yi mi, kɛ e tsui mi kuɔ!

⁷ Se Mawu ma tsɛ̃ mɛ e kɛ̃ɛ̃ ɔmɛ, nɛ e maa plaa mɛ tlukaa.

⁸ E ma kpata a hɛ mi tlukaa ngɛ munyuhi nɛ mɛ nitsɛmɛ a tu ɔ he. Nihi tsuo nɛ maa na mɛ ɔ ma mimiɛ a yi.

⁹ Nɔ tsuaa nɔ maa ye gbeye. A maa sɛɛ nyakpɛ níhi nɛ Mawu tsu, nɛ a ma susu a he saminya.

¹⁰ Nihi tsuo nɛ peeɔ nɔ́ nɛ da a, a nya, nɛ a ngɔ a he kɛ ha Yawɛ. Nihi tsuo nɛ a tsui mi tsɔ ɔ, a wo e hɛ mi nyami.