La 63 - BAIBLO ALOO NGMAMI KLƆUKLƆU Ɔ

Mawu se blɔ hlami

¹ Mawu lee, niinɛ, mo ji ye Mawu; i ngɛ mo hlae kɛ ye tsui tsuo nɛ ma na; o he kuma ngɛ mi yee kaa zugba nɛ gbli kadokado nɛ ngɛ nyu hlae!

² Lɔ ɔ he i ngɛ mo blɔ hyɛe ngɛ he klɔuklɔu ɔ, kaa ma na o he wami ɔ, kɛ o hɛ mi nyami ɔ!

³ O suɔmi nɛ se pui gblegbleegble ɔ hi pe wami nitsɛnitsɛ; lɔ ɔ he ɔ, ma je o yi.

⁴ Ma na mo si ye wami be ɔ tsuo; ma wo ye nine nɔ, nɛ ma fa kue ha mo.

⁵ Ma ná bua jɔmi kaa nɔ nɛ ye niye ní kpakpa, kɛkɛ ɔ, ma la kɛ bua jɔmi kɛ je o yi.

⁶ Ke i kai mo ngɛ ye sa nɔ kikɛ nɛ ɔ, o he sɔuu i susuɔ nyɔ ɔ mi tsuo.

⁷ Be tsuaa be ɔ, mo nɔuu lɛ o piɛɔ ye he; lɔ ɔ he ɔ, ma la kɛ bua jɔmi ngɛ hɔ̃ mi ngɛ o pɛli ɔmɛ a sisi.

⁸ I mɛtɛ o he kpɛii, ejakaa o kɛ kɔni si wami hɛɛ mi.

⁹ Ni nɛmɛ nɛ ngɛ hlae nɛ a kpata ye hɛ mi ɔ ma ya su tsitsaa gbeje tɔɔ.

¹⁰ A maa nɔ ngɛ ta mi, nɛ nga mi gbehi maa ye a gbogboe.

¹¹ Se matsɛ ɔ ma nya saminya; ejakaa Mawu haa e yeɔ kunimi. Nɔ tsuaa nɔ nɛ kɛ Mawu biɛ kaa kita a ma je Mawu yi boboobo, se lakpatsɛmɛ lɛɛ a ma ma a nya.