La 62 - BAIBLO ALOO NGMAMI KLƆUKLƆU Ɔ

Hɛ kɛ Mawu nɔ fɔmi

¹ Mawu pɛ nɔ i ngɔ ye hɛ kɛ fɔ; lɔ ɔ he ɔ, i pee dii kɛ ngɛ lɛ blɔ hyɛe, konɛ e ba he ye yi wami.

² Lɛ pɛ ji ye wesa he, ye yi wami helɔ, kɛ ye he bulɔ, nɛ nɔ ko nɔ ko be mi nyɛe.

³ Kɛ yaa su mɛni be nyɛ tsuo nyɛ ma bla kɛ hao nɔ kake too kikɛ nɛ ɔ, nɔ nɛ ngɛ kaa gbogbo nɛ ku, nɛ miɔ nɛ e maa nɔ si ɔ?

⁴ E yi nɔ sɔuu a ngɛ soe, konɛ a gbla lɛ kɛ je e blɔ he nguaa a kɛ ba nɔ si. Munyu kpakpa jeɔ a nya, se a tsui mi hyi kɛ yayami sɔuu.

⁵ Mawu pɛ nɔ i ngɔ ye hɛ kɛ fɔ; lɔ ɔ he ɔ, i pee dii kɛ ngɛ lɛ blɔ hyɛe, konɛ e ba he ye yi wami.

⁶ Lɛ pɛ ji ye wesa he, ye yi wami helɔ, kɛ ye he bulɔ, nɛ nɔ ko nɔ ko be mi nyɛe.

⁷ Mawu pɛ ji nɔ nɛ he ye yi wami. Lɛ pɛ lɛ e maa wo ye hɛ mi nyami. Mawu ji ye he wami kpetekpleenyɛ. Lɛ ji ye wesa he.

⁸ Be tsuaa be ɔ, nyɛɛ ngɔ nyɛ hɛ kɛ fɔ Mawu nɔ kɛ nyɛ tsui tsuo. Mawu ji wɔ tsuo wa wesa he.

⁹ Nimli adesahi tsuo ngɛ kaa mumi nɛ a woɔ; nimli nguahi jio, nimli wawi jio, mɛ tsuo a pi nɔ́ ko kulaa. Ke a ngmɛ mɛ ngɛ sɛni mi ɔ, a ngɛ wojowojo kulaa, nɛ a jiimi sui mumi nɛ a woɔ.

¹⁰ Nyɛ ko ngɔ nyɛ hɛ kɛ fɔ amimi yemi nɔ; nyɛ ko hyɛ blɔ kaa nyɛ ma na nɔ́ kpakpa ko kɛ je ojo fiami mi. Ke nyɛ ba na ní babauu po, nyɛ ko ngɔ nyɛ hɛ kɛ fɔ nɔ.

¹¹ Pi si kake pɛ nɛ Mawu tu munyu nɛ ɔ; e de si abɔ ke, he wami ɔ, lɛ Mawu ɔ e ngɔ e jee.

¹² E de hu ke lɛ Nyɔmtsɛ ɔ, e suɔmi ɔ ngɛ daa. Ee, mo Nyɔmtsɛ nitsɛ lɛ o woɔ nɔ tsuaa nɔ hiɔ bɔ nɛ sa e ní tsumi.