La 60 - BAIBLO ALOO NGMAMI KLƆUKLƆU Ɔ

Mo he ye yi wami

¹ Mawu lee, o sake wɔ kɛ pue he. O mi mi fu wɔ, nɛ o gbɛ wɔ ngɔ fĩa. Se kpale wɔ kɛ ba wa glɛ nɔ ekohu koo!

² O ha zugba a mimiɛ, nɛ e mi gba hatoo; moo tsi e hehi nɛ wo muɔ ɔ, ejakaa e ngɛ gbɛe kulaa.

³ O ha o ma a na amanehlu nɛ nya wa; wa ngɛ didaae kaa nihi nɛ de dã.

⁴ O si aflangaa ko ha ni nɛmɛ nɛ yee mo gbeye ɔ, konɛ a bua a he nya kɛ ba o ngɔ nɛ a hɛ mi ko kpata.

⁵ Ngɔɔ o he wami kpetekpleenyɛ ɔ kɛ he wa yi wami. Bu wa kue fami ɔ tue, konɛ ma nɛ mo nitsɛ o suɔ ɔ yi nɛ na wami.

⁶ Mawu de ngɛ e he klɔuklɔu ɔ ke, “Ma hwɔ lele kɛ gba Shekem mi; nɛ ma dla Sukot kɔ̃ ɔ mi kɛ ha ye ma a.

⁷ Ye mahi ji Gilead, kɛ Manase. Efraim ji ye dade pɛɛ, nɛ Yuda ji ye matsɛ tso.

⁸ Moab ji ye hedu buɛ. Ma sake ye tokota kɛ pue Edom nɔ kɛ tsɔɔ kaa a ye e nɔ. Ma he ose kɛ ye Filistia nɔ kunimi.”

⁹ Mɛnɔ maa ngɔ mi kɛ ya ma nɛ a fia gbogbo kɛ wo he ɔ mi? Mɛnɔ ma ya sɛ mi Edom?

¹⁰ Mawu, anɛ pi mo nɛ o kua wɔ ɔ lo? Mawu, o kɛ wa tabo ɔ tsa yɛ ta!

¹¹ Piɛ wa he, konɛ waa kɛ he nyɛlɔ ɔ nɛ kpe. Ejakaa nɔmlɔ adesa he wami pí nɔ́ ko!

¹² Nɛ́ Mawu kɛ wɔ ngɛ nɛ ɔ, wa maa ye kunimi. Lɛ ji nɔ nɛ maa ye wa he nyɛli ɔmɛ a nɔ ha wɔ.