La 6 - BAIBLO ALOO NGMAMI KLƆUKLƆU Ɔ

Yemi kɛ buami ngɛ amanehlu mi

¹ Yawɛ, koo ngɔ abofu kɛ ka ye hɛ mi; koo ngɔ mi mi la kɛ gbla ye tue.

² Yawɛ naa mi mɔbɔ, ejakaa ye he wami ta. Yawɛ, tsa mi koo, ejakaa i be he wami,

³ nɛ imi nɔmlɔ ɔ tsuo i hao. Yawɛ, mɛni be o maa mlɛ kɛ yaa si loko o ma ba he mi?

⁴ Yawɛ, ba he ye yi wami koo! Naa mi mɔbɔ nɛ o kpɔ mi, ejakaa o suɔmi ɔ be nyagbe.

⁵ Nɔ ko kaii we mo ngɛ gbeje; mɛnɔ lɛ ma je o yi ngɛ lejɛ ɔ?

⁶ Kɔmɔ yemi sɔuu ha nɛ i gbɔjɔ; daa nyɔ mi ɔ, ye sa pɔɔ kɛ vo nyu sɔuu; daa nyɔ mi ɔ, i foɔ ya kɛ pɔɔ ye sɔne.

⁷ Ye he nyɛli ɔmɛ haoɔ mi. Kɔmɔ yemi sɔuu puɛ ye hɛngmɛ, nɛ i hyɛ we nɔ́ kpakpa ko hu.

⁸ Nyɛ yayami peeli, nyɛɛ je ye nɔ kɛ ya se, ejakaa Yawɛ nu ye ya fomi ɔ.

⁹ Yawɛ nu ye kue fami ɔ; Yawɛ maa pee ye hiami ní ɔmɛ ha mi.

¹⁰ Ha nɛ zo nɛ gbe ye he nyɛli ɔmɛ tsuo, nɛ a hao wawɛɛ nitsɛ. Ha nɛ a kɛ zo kpɔtɔɔ nɛ kpale kɛ ho esɔ!