La 59 - BAIBLO ALOO NGMAMI KLƆUKLƆU Ɔ

Mawu, moo bu ye he

¹ Ye Mawu, mo je mi kɛ je ye he nyɛli a dɛ mi, moo bu ye he, konɛ nihi nɛ te si wo mi ɔ, a ko nyɛ mi.

² Je mi kɛ je yiwutsotsɛmɛ a dɛ mi; ko ha nɛ muɔ si pueli a nine nɛ su ye nɔ.

³ Yawɛ, hyɛ kaa dikali bua a he nya, konɛ a kpata ye hɛ mi, pohu i pee we yayami ko.

⁴ A he sɔ, nɛ a dla kɛ wo ye he, pohu i pee we mɛ yayami ko. Tee si, ba piɛ ye he. Hyɛ kaa ye yi fi.

⁵ Yawɛ Tabohiatsɛ Mawu, mo ji Israel Mawu ɔ nɛ! Tee si nɛ o ba gbla je ma amɛ a tue. Yiwutsotsɛmɛ nɛ ngɛ yi mi yaya toe ɔ, koo na mɛ mɔbɔ.

⁶ Daa gbɔkuɛ ɔ, a kpaleɔ kɛ baa kɛ ngmlaa kaa gbehi kɛ ba kpaa ma a mi tsuo.

⁷ Mɛ lɛ a ngɛ ngmlaa kpae hoo ngɛ lejɛ ɔ nɛ; a ngɛ huãe kɛ ngɛ pɛe ke, “Mɛnɔ maa nu wa he?”

⁸ Se mo Yawɛ, o ngɛ mɛ muɔe; o ngɛ je ma amɛ tsuo a he fɛu yee.

⁹ Ma la kɛ je o yi, mo ji ye he wami; mo Mawu ji ye wesa he.

¹⁰ Ye Mawu nɛ e suɔmi be nyagbe ɔ ma ba kpee mi. Ye Mawu ɔ ma ha nɛ ma na ye he nyɛli ɔmɛ nɛ a gbe mɛ kɛ pueɔ si.

¹¹ Nyɔmtsɛ, wa yi baalɔ, koo gbe mɛ; ke o pee ja a, e be kɛe nɛ ye ma a hɛ maa je nɔ, a hɛ maa je nɔ́ nɛ o pee nɛ ɔ nɔ. Ngɔɔ o he wami ɔ kɛ ha nɛ a didaa, nɛ o ngɔ mɛ kɛ fiaa si.

¹² Munyuhi nɛ jeɔ a nya a, yayami sɔuu, nɛ a hlaa kaa a wo a he nɔ. Lɔ ɔ he ɔ, ba mɛ si! Akɛnɛ a gbiɛɛ nɔ, nɛ a yeɔ lakpa he je ɔ, ha nɛ a he nɔ womi ɔ nɛ pee klama nɛ du mɛ.

¹³ Ngɔɔ mi mi la kɛ kpata a hɛ mi; ee, mo kpata a hɛ mi pɛsɛpɛsɛ, konɛ nimli adesahi tsuo nɛ a na nɛ a le kaa Mawu ngɛ matsɛ yee ngɛ Israel, nɛ e matsɛ yemi ɔ ngɛ kɛ yaa su je mi nyagbe he tɔɔ.

¹⁴ Daa gbɔkuɛ ɔ, ye he nyɛli ɔmɛ kpaleɔ kɛ baa kɛ ngmlaa kaa gbehi, nɛ a ba kpaa ma a mi tsuo.

¹⁵ A kpaa si kɛ hlaa niye ní; nɛ ke a na we ní nɛ a ye nɛ a tɔ ɔ, a kpaa ngmlaa kaa gbehi.

¹⁶ Se imi lɛɛ ma la kɛ je o yi, ejakaa o he wa. Daa mɔtu ɔ, ma la wawɛɛ kɛ je o yi, ejakaa o suɔmi ɔ ngɛ daa. Be nɛ i ngɛ amanehlu mi ɔ, mo lɛ o bu ye he, nɛ o baa ye yi.

¹⁷ Mawu, mo o nɔ ma ngɔ ye hɛ kɛ fɔ, ejakaa mo Mawu ji ye wesa he. Ma la kɛ je o yi, ejakaa mo, Mawu lɛ o naa mi mɔbɔ daa.