La 56 - BAIBLO ALOO NGMAMI KLƆUKLƆU Ɔ

Ngɔɔ hɛ kɛ fɔ Mawu nɔ

¹ Mawu lee, naa mi mɔbɔ, ejakaa nimli adesahi ngɛ mi yi mi wae; ye futsɛmɛ ngɛ mi haoe daa ligbi.

² Daa nɛ ɔ, yi mi sɔuu ye he nyɛli ngɛ mi wae; ni nɛmɛ nɛ te si kɛ wo mi ɔ, a he hiɛ babauu.

³ Ke i ngɛ gbeye yee kikɛ nɛ ɔ, mo Hiɔwe no ɔ pɛ o nɔ i ngɔɔ ye hɛ kɛ fɔɔ.

⁴ I ngɔ ye hɛ kɛ fɔ Mawu nɔ, lɔ ɔ he ɔ, i yi gbeye. I ngɛ Mawu yi jee ngɛ si nɛ e wo mi ɔ he. Mɛni nɔmlɔ adesa ma nyɛ maa pee mi?

⁵ Daa nɛ ɔ, ye he nyɛli ɔmɛ ngɛ ye munyu hɛ mi tsakee; yayami pɛ lɛ a hii susue ha mi.

⁶ A buaa a he nya, nɛ a huɔɔ mi, kɛ ye ní peepee, konɛ a na ye he blɔ nɛ a gbe mi.

⁷ Mawu, ngɔɔ o mi mi la kɛ gbla kikɛmɛ a nimli nɛ ɔmɛ a tue ngɛ a yi wu tso ní ɔmɛ a he!

⁸ O le bɔ nɛ i ngɛ haoe ha; ye vo nyu ma hyi o tɔ ɔ. Tse o kadi lɛ tsuo ngɔ wo o womi ɔ mi?

⁹ Ligbi ɔ nɛ ma fa kue ha mo pɛ ye he nyɛli ɔmɛ maa kpale a se. I le kaa Mawu kɛ mi ngɛ.

¹⁰ Yawɛ Mawu yeɔ e siwo nɔ, lɔ ɔ he ɔ, e yi i ngɛ jee.

¹¹ I ngɔ ye hɛ kɛ fɔ Mawu nɔ, lɔ ɔ he ɔ, i yi gbeye. Mɛni nɔmlɔ adesa ma nyɛ maa pee mi?

¹² Mawu, si nɛ i wo mo ɔ, ma ye nɔ; ma ngɔ sina bɔ kɛ ba ha mo.

¹³ Ejakaa o he ye yi wami kɛ je gbenɔ mi. O ha we nɛ ma tɛ nɔ nɛ ma nɔ si, bɔ nɛ pee nɛ ma nyɛɛ ngɛ o hɛ mi he nɛ o la kpɛɔ ngɛ kɛ haa hɛ kali ɔ.