La 55 - BAIBLO ALOO NGMAMI KLƆUKLƆU Ɔ

Nɔ ko nɛ e huɛ tsɔɔ e se blɔ e kue fami

¹ Mawu, bu ye kue fami ɔ tue; kue nɛ i ngɛ fae ha mo ɔ, koo tsi o tue.

² Bu mi tue koo, nɛ o he nɔ ha mi; ye haomi ɔmɛ ba pe mi.

³ Ye he nyɛli ɔmɛ ngɛ ye he gbeye woe. Yiwutsotsɛmɛ ngɛ mi yi mi wae. A ngɛ mi haoe, nɛ a mi mi fu mi wawɛɛ kɛ ngɛ mi nyɛe yaka.

⁴ I ngɛ gbeye yee wawɛɛ. Gbenɔ he fɔ̃ nu mi.

⁵ Gbeye sɔuu ha ye he ngɛ doe blibliibli, nɛ tsuipo ha sawale nu mi.

⁶ Bɔ nɛ i ngɛ dee ji, “I na nɛ i ngɛ pɛli kaa lahuɛ, jinɛ i ko te kɛ je nɛ i ya jɔɔ ye he.

⁷ Niinɛ, i ko te kɛ ya tsitsaa, nɛ i ko ya hi nga kplanaa a nɔ tɔɔ.

⁸ I ko te mla kɛ ya laa ye he kɛ je kɔɔhiɔ vuduvudu, kɛ ahumi nɛ ɔ nya.”

⁹ Nyɔmtsɛ, ha nɛ ye he nyɛli ɔmɛ a yi mi tomi ɔmɛ nɛ pee yaka. Mo tsaka a gbi ɔ, nɛ o ko ha nɛ a nu a sibi sisi. Ejakaa yi mi wami, kɛ pɛ hyi ma a mi tɔ.

¹⁰ Nyɔ kɛ pia tsuo gbogbo ɔmɛ a nɔ ma mi bi ɔmɛ hii nyɛɛe kɛ hii ma a bɔlee, nɛ a ha yayami peemi, kɛ haomi sɔuu hyi ma a mi.

¹¹ Nihi a hɛ mi sɔuu a ngɛ kpatae ngɛ ma a mi; gbɛjegbɛ ɔmɛ a nɔ hu, yi mi wami, kɛ amimi yemi sɔuu lɛ ngɛ nɔ yae.

¹² Kaa ye he nyɛlɔ nɛ ngɛ mi ahlua nɛ ɔ bɔe ɔ, i ko de we nɔ́ ko; nɛ kaa ye futsɛ lɛ ngɛ e he nɔ woe ngɛ ye nɔ ɔ, i ko ngɔ ye he kɛ laa lɛ.

¹³ Se e ya pee mo, ye juã, ye he nɔ, kɛ ye huɛ kpakpa.

¹⁴ Wa sɛɛɔ wa yi mi ní ngɔngɔɛ kɛ haa wa sibi, nɛ wa blaa kɛ ya jaa Mawu ngɛ e we ɔ.

¹⁵ Ha nɛ ye he nyɛli ɔmɛ nɛ a gbo tlukaa; ha nɛ a hi a nane nya kɛ ya gbeje! Ejakaa yayami ngɛ a we ɔmɛ a mi, kɛ a tsui mi.

¹⁶ Se imi lɛɛ Yawɛ Mawu ɔ nitsɛ i ngɛ tsɛe, nɛ e ma he ye yi wami.

¹⁷ Mɔtu, piani, kɛ nyɔ mi tsuo i ngɛ kɔmɔ yee, nɛ i ngɛ kɛmɛe; e maa bu mi tue kɛ̃.

¹⁸ Ta nɛ i kɛ ye he nyɛli babauu ɔ ngɛ hwue ɔ, e ma kpɔ mi kɛ je mi, nɛ ma ye ye he.

¹⁹ Mawu nɛ ngɛ matsɛ yee kɛ je teteete ɔ maa nu ye kue fami ɔ; e maa ye a nɔ kunimi ejakaa a kua a tsui tsakemi, nɛ a yi Mawu gbeye.

²⁰ Ye he nɔ ya tua e huɛ; somi nɛ e kɛ mi so ɔ, e yi nɔ.

²¹ E tuɔ munyu dɔkɔbii, se ta mohu he e ngɛ susue. E munyuhi a he jɔ bɔdɔɔ pe nu po, se afani klaatehi nɛ a hia kɛ je kpo mi.

²² Ngɔɔ o haomi ɔmɛ kɛ ha Yawɛ, nɛ e maa bu o he. Nɔ nɛ peeɔ nɔ́ nɛ da a, Mawu be blɔ ngmɛe kɔkɔɔkɔ nɛ he nyɛlɔ nɛ ye e nɔ kunimi.

²³ Se mo Mawu, o ma sake mɛ kɛ fɔ muɔ voo ɔ mi; muɔ si pueli, kɛ lakpatsɛmɛ be a wami be ɔ fa tete po yee ngɛ je mi. Se imi lɛɛ ma ngɔ ye hɛ kɛ fɔ o nɔ.