La 50 - BAIBLO ALOO NGMAMI KLƆUKLƆU Ɔ

Anɔkuale jami

¹ Yawɛ Mawu Ope ɔ ngɛ munyu tue. E ngɛ je ɔ tsuo tsɛe; e ke a je beleku je, kɛ bonyoku je kɛ ba.

² Mawu hɛ mi nyami ɔ ngɛ kpɛe saminyayoo; Zion, ma nɛ ngɛ fɛu kɛ pi si ɔ mi e ngɛ kpɛe kɛ ngɛ jee.

³ Wa Mawu ɔ ma oo, e pee we di, se mohu la gegeege nɛ puɛɔ nɔ́ ngɛ e hɛ mi kɛ ma, nɛ ahumi ngɛ fiae kɛ ngɛ lɛ bɔlee.

⁴ E maa kojo e ma a; lɔ ɔ he ɔ, e ngɛ hiɔwe kɛ zugba odase tsɛe.

⁵ Bɔ nɛ e ngɛ dee ji nɛ ɔ nɛ: “Ye ni klɔuklɔuhi nɛ i kɛ mɛ so kɛ gu bɔ sami mi ɔ, nyɛ bua a nya kɛ ba ha mi.”

⁶ Hiɔwe tsuo ngɛ dee ke Mawu ɔ, dalɔ kɛ kojolɔ ji lɛ.

⁷ “Ye ma, nyɛ ta tue saminya, konɛ nyɛɛ nu nɔ́ nɛ ma de kɛ si nyɛ, Israel ma. Imi ji nyɛ Mawu ɔ nɛ.

⁸ Bɔhi, kɛ sami bɔhi nɛ nyɛ kɛ baa ye hɛ mi ɔ, pi lɔ ɔmɛ a he nɛ i ngɛ nyɛ hɛ mi kae ngɛ.

⁹ Pohu i hla we nɛ nyɛɛ ngɔ na kɛ je nyɛ ngmɔ mi, loo to akpakpo kɛ je nyɛ to tsu mi kɛ ba ha mi.

¹⁰ Ejakaa pu mi lohwehi, kɛ lohwehi nɛ ngɛ yokuhi tsuo a nɔ ɔ, ye níhi ji mɛ.

¹¹ I le nga mi lohwe pɛlitsɛmɛ tsuo, pu mi lohwehi hu ye níhi.

¹² “Ke hwɔ ngɛ mi yee ɔ, i be nyɛ dee, ejakaa ye nɔ́ ji je ɔ kɛ e mi nɔ́ tsuaa nɔ́.

¹³ Anɛ i yeɔ na lo, aloo i nuɔ to akpakpo muɔ?

¹⁴ Nyɛɛ sã bɔ nɛ nyɛ kɛ na Mawu si, konɛ si nɛ nyɛ wo Hiɔwe No ɔ, nyɛɛ ye nɔ.

¹⁵ Ke nyɛ yi fi ɔ, nyɛ tsɛ mi; ma je nyɛ, konɛ nyɛɛ wo ye hɛ mi nyami.”

¹⁶ Se yayami peelɔ ɔ, bɔ nɛ Mawu ngɛ lɛ dee ji, “Mɛnɔ ha mo he blɔ ke o kane ye mlaa amɛ blɛblɛɛblɛ, loo o tu ye somi ɔ he munyu?

¹⁷ O sume tsɔsemi, nɛ ye munyu hu o sake ngɔ fɔ o tue se.

¹⁸ Ke o na julɔ ɔ, o kɛ lɛ tsɔɔ huɛ, nɛ gba puɛli o kɛ bɔɔ.

¹⁹ “O he sɔɔ kɛ tuɔ munyu yaya be tsuaa be; nɛ lakpa jeɔ o nya puu.

²⁰ O yeɔ o nyɛmimɛ a he sieku, nɛ o nyɛbi po o puɛɔ e biɛ.

²¹ O pee ní nɛ ɔmɛ tsuo; se akɛnɛ i de we nɔ́ ko he je ɔ, o susu kaa i ngɛ kaa mo. Jehanɛ lɛɛ i ngɛ o hɛ mi kae; i ngɔ nɔ́ tsuaa nɔ́ kɛ ngɛ o hɛ mi mae paa.

²² “Nyɛ nihi tsuo nɛ nyɛ hɛ je imi Mawu, ye nɔ ɔ, nyɛ susu nɔ́ nɛ ɔ he saminya. Ke pi ja a, ma tsɔtslɔɔ nyɛ, nɛ nɔ ko nɔ ko be nɛ ma kpɔ nyɛ.

²³ Nɔ nɛ ba sãã bɔ kɛ naa mi si ɔ, e ngɛ ye hɛ mi nyami woe. Nɔ nɛ peeɔ nɔ nɛ da a, imi Mawu hu ma he e yi wami.”