La 5 - BAIBLO ALOO NGMAMI KLƆUKLƆU Ɔ

Yawɛ, moo bu ye he

¹ Yawɛ, bu ye munyu ɔmɛ tue, nɛ huu nɛ i ngɛ faeɔ, o pee he nɔ́ ko ha mi.

² Ye matsɛ kɛ ye Mawu! I ngɛ mo tsɛe! Bu mi tue koo!

³ Yawɛ, mɔtu ɔ, o nuɔ ye gbi. Ee, mɔtu ɔ, i faa kue kɛ haa mo, nɛ i mlɛɔ, konɛ o he nɔ.

⁴ Ejakaa pi Mawu nɛ náa nɔ́ yayami he tsui ji mo; yayami kɛ mo hí si.

⁵ He nɔ woli be nyɛe maa ba o hɛ mi; o sume nihi nɛ peeɔ yayami.

⁶ Mo Yawɛ, o kpataa lakpatsɛmɛ a hɛ mi. Muɔ si pueli, kɛ nɔ sisili lɛɛ o hiee mɛ kulaa.

⁷ Se imi lɛɛ, o mɔbɔ nami, kɛ o dloomi ɔ he je ɔ, ma nyɛ ma ba o we klɔuklɔu ɔ; ma ja mo ngɛ lejɛ ɔ kɛ gbeye yemi.

⁸ Yawɛ ye he nyɛli ɔmɛ a he je ɔ, piɛ ye he, konɛ ma pee nɔ nɛ da. Tsɔɔ mi o blɔ ɔ saminya nɛ ma nyɛɛ nɔ.

⁹ Ejakaa ye he nyɛli ɔmɛ tu we anɔkuale; yayami hyi a tsui mi tɔ. A tuɔ munyu dɔkɔdɔkɔ, se lɛ tsuo kɛ gbenɔ ba a.

¹⁰ Mawu, buu mɛ fɔ, nɛ o gbla a tue. Ha nɛ a yi mi tomi yayami ɔmɛ nɛ kpa kɛ bu mɛ nitsɛmɛ a nɔ. Fie mɛ kɛ je o hɛ mi, ejakaa a pee yayamihi gbegbeegbe kɛ si mo, nɛ a tsɔ o hɛ mi atuã.

¹¹ Se nihi tsuo nɛ ba saa we ngɛ o ngɔ ɔ, ha nɛ a nya, nɛ a la kɛ bua jɔmi daa. Ni nɛmɛ nɛ suɔ mo ɔ, buu a he, konɛ a na bua jɔmi ngɛ o mi.

¹² Yawɛ, o gbaa nihi nɛ peeɔ nɔ́ nɛ da, nɛ o kɛ o suɔmi ɔ buu a he kaa tsɛ̃i.