La 49 - BAIBLO ALOO NGMAMI KLƆUKLƆU Ɔ

Koo ngɔ hɛ kɛ fɔ ní nami nɔ

¹ Je ɔ mi nihi tsuo, nyɛɛ bu mi tue. Nyɛ ta tue saminya ha mi!

² Ni nguahi kɛ ni wawi, niatsɛmɛ kɛ ohiatsɛmɛ, nyɛ tsuo nyɛ ta tue!

³ Munyu nɛ maa je ye nya a, nile munyu sɔuu. Munyuhi nɛ a mi kuɔ saminya a he ma susu.

⁴ Ma bu tue nɛ ma nu abɛ ko, nɛ ma fia kpa saku kɛ tsɔɔ nya.

⁵ Ke he nyɛli bɔle mi kɛ kpe, nɛ a ngɛ mi nisɛ ní pee po, mɛni he je ma ye gbeye?

⁶ He nyɛli ɔmɛ ɔ, pi ní nɛ a na a nɔ nɛ a ngɔɔ a hɛ kɛ fɔɔ? Pi ní babauu nɛ a na a nɔ nɛ a fĩaa kɛ fɔɔ lo?

⁷ Niinɛ, nɔ ko nɔ ko be lɛ nitsɛ e he nyɛe ma kpɔ; nɔ ko nɔ ko be nyɛe maa wo Mawu hiɔ nɛ maa su e wami nya.

⁸ Nɔmlɔ adesa wami he jua wa saminya, nɛ nɔ ko nɔ ko be Mawu hiɔ nyɛe maa wo nɛ maa su nya,

⁹ konɛ e hi je mi daa, nɛ e ko gbo.

¹⁰ Nɔ tsuaa nɔ le nɔ́ nɛ ɔ: ni lelɔ po gboɔ, nɛ kuasia nɛ be juɛmi hu gboɔ ja nɔuu. Mɛ tsuo a siɔ a ní ɔmɛ kɛ haa ni kpahi.

¹¹ A susuɔ kaa a we ɔmɛ, kɛ a zugba amɛ maa hi si daa; nɛ a kɛ a biɛhi woɔ zugba amɛ, se gbeje mohu ya peeɔ a hi he kɛ yaa yi nɔhi tsuo.

¹² Nɔmlɔ adesa gboɔ kaa bɔ nɛ lohwehi tsuo gboɔ ɔ; e hɛ mi nyami ɔ kɛ lɛ hí si kɛ yɛ neneene.

¹³ Nihi nɛ ngɔɔ a hɛ kɛ fɔɔ mɛ nitsɛmɛ a he nɔ, kɛ ni nɛmɛ nɛ ní nami se pɛ a dii ɔ, bɔ nɛ a nyagbe maa ba ji nɛ ɔ nɛ:

¹⁴ a ma gbo kaa to gboɔ; gbenɔ maa ngɔ mɛ kɛ ya gbeje tɔɔ. Se ni nɛmɛ nɛ peeɔ nɔ nɛ da a maa ye yayami peeli a nɔ; yayami peeli a nɔmlɔ tso ɔ ma puɛ kulaa, nɛ gbeje maa pee a hi he.

¹⁵ Se imi lɛɛ Mawu ma kpɔ mi kɛ je gbenɔ dɛ mi. E maa ngɔ mi kɛ ba e ngɔ.

¹⁶ Ke yayami peelɔ ná ní babauu kɛ be nɔ, nɛ e we mi hyi tɔ kɛ afɛu níhi ɔ, koo ye o tsui ngɛ he.

¹⁷ Ejakaa ke e gbo ɔ, e be ní nɛ ɔmɛ ekoeko ngɔe kɛ ya gbeje.

¹⁸ Ke e na bua jɔmi saminya, benɛ e na ní, nɛ nihi je e yi kaa e bɔ mɔde tete po ɔ,

¹⁹ e ma ya piɛ e nɛmɛ nɛ gbo blema a a he; nɛ lejɛ ɔ, e be la nae gblegbleegble hu.

²⁰ Nɔmlɔ adesa gboɔ kaa bɔ nɛ lohwehi tsuo gboɔ ɔ, e we agboje ɔ kɛ lɛ hí si kɛ yɛ neneene.