La 47 - BAIBLO ALOO NGMAMI KLƆUKLƆU Ɔ

Matsɛ kpetekpleenyɛ ɔ

¹ Je ma amɛ tsuo, nyɛɛ fia nyɛ dɛ mi! Nyɛɛ kɛ bua jɔmi nɛ he ose kɛ je Mawu yi!

² Yawɛ, nɔ nɛ ngɛ hiɔwe lokoo ɔ he ngɛ gbeye. Matsɛ kpetekpleenyɛ nɛ yeɔ je ɔ tsuo nɔ ji lɛ.

³ E jɔɔ ma amɛ a he ha wɔ, konɛ waa ye a nɔ.

⁴ Lɛ nitsɛ nɛ e ngɔ zugba nɛ wa ngɛ nɔ nɛ ɔ ngɔ ha wɔ. E ngɔ weto ní kpakpa nɛ ɔ ngɔ ha e ma Yakob nɛ e suɔ saminya a.

⁵ Mawu ho hiɔwe ya, nɛ a he ose! Yawɛ ho hiɔwe ya, nɛ titimati pɛ, benɛ e yaa hi e sɛ ɔ nɔ ɔ!

⁶ Nyɛ la kɛ je Mawu yi! Nyɛ la kɛ je wa matsɛ ɔ yi! Nyɛ la kɛ je e yi.

⁷ Ejakaa Mawu ji matsɛ nɛ yeɔ je ɔ tsuo nɔ. Nyɛ la yi jemi la ha lɛ.

⁸ Mawu hii si ngɛ e matsɛ sɛ klɔuklɔu ɔ nɔ! E ngɛ je ma amɛ tsuo a nɔ yee.

⁹ Je ma amɛ a ganɔ ɔmɛ bua a he nya kɛ ba, konɛ a ba pee Abraham Mawu ɔ ma. E he wa pe je nɛ ɔ mi tabo ɔmɛ tsuo. Matsɛ kpetekpleenyɛ ji lɛ.