La 46 - BAIBLO ALOO NGMAMI KLƆUKLƆU Ɔ

Mawu kɛ wɔ ngɛ

¹ Mawu ji wa wesa he, kɛ wa he wami. Wa fimi behi tsuo a mi ɔ, e ngɛ wa kasa nya.

² Lɔ ɔ he ɔ, ke zugba mimiɛ, nɛ yohi hia kɛ ya pue wo mi po, wa be gbeye yee.

³ Ke wo ɔ gli, nɛ oslɔke ɔmɛ ku kɛ ngmlaa hoo, nɛ e ha yo ɔmɛ mimiɛ po, wa be gbeye yee.

⁴ Pa ko ngɛ nɛ e kɔni ɔmɛ haa Mawu ma a bua jɔɔ a he. Hiɔwe no ɔ hi he ɔ ngɛ klɔuklɔu.

⁵ Mawu ngɛ jamɛ a ma a mi, lɔ ɔ he ɔ, ma a hɛ mi be kpatae kɔkɔɔkɔ. Loko haomi maa ba a nɔ ɔ, Mawu je ngmlaa ha mɛ momo.

⁶ Je ma amɛ a mi mi fuɔ, nɛ a peeɔ hoo; se ke Mawu wo gbi ɔ, zugba a he jɔɔ.

⁷ Yawɛ, Tabohiatsɛ ɔ kɛ wɔ ngɛ; Yakob Mawu ɔ ji wa wesa he.

⁸ Nyɛɛ hyɛ níhi nɛ Yawɛ tsu, bɔ nɛ e kpata níhi a hɛ mi ngɛ zugba a nɔ.

⁹ E haa ta se poɔ ngɛ je ɔ mi tsuo; e kuɔ kɛ̃ɛ̃hi, kɛ akplɔhi a mi, nɛ e kɛ la sãã ta zugba lɛhi!

¹⁰ Mawu ke, “Nyɛɛ pee dii, nɛ nyɛ na nyɛɛ le kaa imi ji Mawu ɔ nɛ. Je ma amɛ tsuo a kpɛti ɔ, nɔ ko nɔ ko be nɛ kɛ mi sɔ. Je ɔ mi hu nɔ ko pi mi.”

¹¹ Yawɛ Tabohiatsɛ ɔ kɛ wɔ ngɛ; Yakob Mawu ɔ ji wa wesa he.