La 41 - BAIBLO ALOO NGMAMI KLƆUKLƆU Ɔ

Hiɔtsɛ ko kue fami

¹ A gbaa nɔ nɛ susuɔ nihi nɛ a ní ngɛ mɔbɔ a he; ke haomi ba e nɔ ɔ, Yawɛ maa piɛ e he.

² Yawɛ maa bu e he, nɛ e yi ma na wami. Yawɛ maa gbaa lɛ ngɛ zugba a nɔ, nɛ e be e he ngmɛɛe kɛ ha e he nyɛli.

³ Ke e be he wami ɔ, Yawɛ maa piɛ e he, nɛ e ma tle lɛ si ngɛ e hiɔ sa nɔ.

⁴ I de ke, “Yawɛ, i pee mo yayami; naa mi mɔbɔ, nɛ o tsa mi.”

⁵ Ye he nyɛli ɔmɛ tuɔ ye he munyu yaya. A deɔ ke, “Mɛni be po e ma gbo nɛ e biɛ maa laa?”

⁶ Nihi nɛ ba slaa mi ɔ, kɔmɔ nɛ a kɛ mi ba yeɔ ɔ, kɔmɔ ɔ ji a tsui mi. Ke a ba a, ye he sane yaya a ba hlaa, nɛ ke a kpale a se ɔ, a ya sɛɛɔ.

⁷ Nihi tsuo nɛ sume mi ɔ, a kɛ a sibi tuɔ ye he munyu kusikusi. A susuɔ ye he yayami.

⁸ A deɔ ke, “Hiɔ yaya ko nu lɛ; si nɛ e nɔ nɛ ɔ, e pa be si tee hu.”

⁹ Ye huɛ nitsɛnitsɛ nɛ i heɔ lɛ yeɔ, nɛ i kɛ lɛ yeɔ ní ɔ, lɛ po e te si wo mi.

¹⁰ Se mo Yawɛ, moo na mi mɔbɔ! Ha ma na he wami ekohu, konɛ ma wo mɛ hiɔ ngɛ nɔ́ nɛ a pee mi ɔ he.

¹¹ Ye he nyɛli ɔmɛ be ye nɔ yee; nɛ enɛ ɔ maa tsɔɔ mi kaa o ngɛ ye he bua jɔmi.

¹² O maa piɛ ye he, ejakaa i peeɔ nɔ́ nɛ da. O kɛ mi maa hi si daa.

¹³ A je Yawɛ, Israel Mawu ɔ yi! A je e yi mwɔnɛ nɛ ɔ; a je e yi daa. Amen!