La 4 - BAIBLO ALOO NGMAMI KLƆUKLƆU Ɔ

Gbɔkuɛ kue fami kɛ ha yemi kɛ buami

¹ Ye Mawu nɛ faa ye he, moo bu ye kue fami ɔ tue koo! Be ko nɛ ye yi fi ɔ, mo lɛ o ba je mi. Naa mi mɔbɔ koo, nɛ o bu ye pɛɛ kpami ɔ tue.

² Nyɛ nimli adesahi, mɛni be nyɛ ma pue ye hɛ mi si kɛ yaa si? Nyɛ suɔ níhi nɛ a he be se nami, nɛ lakpa munyuhi a se nyɛ dii. Kɛ yaa si mɛni be nɛ nyɛ maa hi enɛ ɔ pee?

³ Se nyɛ ná nɛ nyɛɛ le kaa Yawɛ hla nihi nɛ peeɔ nɔ nɛ da kɛ ha e he; nɛ ke i tsɛ lɛ ɔ, e nuɔ.

⁴ Ke nyɛ mi mi fu ɔ, nyɛ ko pee yayami. Ke nyɛ hwɔɔ si ɔ, nyɛɛ pee dii, nɛ nyɛɛ ya nyɛ yi mi.

⁵ Nyɛɛ sã bɔ nɛ sa ha Yawɛ; nyɛɛ ngɔ nyɛ hɛ kɛ fɔ e nɔ.

⁶ Nihi babauu biɔ ke, “Mɛnɔ po maa dloo wɔ nɔ́ ko? Yawɛ, naa wɔ mɔbɔ koo!”

⁷ Se imi lɛɛ o ha mi bua jɔmi babauu. Ke nimli nɛ ɔmɛ a blɛfo kɛ wai ba saminya po, a na we bua jɔmi kaa imi.

⁸ Ma hwɔ si nɛ ma hwɔ mahe ngɛ tue mi jɔmi mi. Ejakaa mo, Yawɛ pɛ lɛ o haa nɛ ye he mi jɔɔ mi.