La 38 - BAIBLO ALOO NGMAMI KLƆUKLƆU Ɔ

Nɔ́ nalɔ ko kue fami

¹ Yawɛ, koo ngɔ abofu kɛ ka ye hɛ mi! Koo gbla ye tue kɛ mi mi fumi.

² O ngɔ o kɛ̃ɛ̃ mi bi ɔmɛ kɛ plaa mi; o tsɛ̃ mi ngɔ fɔ si.

³ Akɛnɛ o mi mi fu mi he je ɔ, i na we he jɔmi ko kulaa. Ye yayami ɔmɛ a he je ɔ, ye he mi tsɔ we mi.

⁴ Ye yayami ɔmɛ pee kaa tlomi nɛ i tloo; a pee kaa tlomi nɛ jiɔ tsɔ, nɛ ngɛ mi gbee.

⁵ Ye pa amɛ sa, nɛ a he fu; ejakaa i je kuasia.

⁶ Ye mi dɔ kɔmɔɔ, nɛ i ma ye yi si; daa nɛ ɔ, kɔmɔ kɛkɛ i ngɛ yee.

⁷ Ye se fɛ, nɛ e ngɛ mi sããe hɛii kaa la; ye he mi tsuo puɛ.

⁸ Imi nɔmlɔ ɔ tsuo i gbɔjɔ, nɛ i ku; ye tsui ngɛ fiae, nɛ i ngɛ kɛmɛe.

⁹ Nyɔmtsɛ, o le ye hiami ní ɔmɛ tsuo; ye kɛmɛmi ɔ hu o le.

¹⁰ Ye tsui ngɛ fiae kpla, kpla! Ye he wami ta, nɛ ye hɛngmɛ hu miɔ nɛ e ma yu.

¹¹ Ye hiɔ ɔ he je ɔ, ye suɔli, kɛ ye huɛmɛ bɛ ye kasa nya. Ye nyɛmimɛ tete po, se lokoo a daa.

¹² Nihi nɛ ngɛ mi hlae nɛ a gbe ɔ tsɔɔ mi klama. Ni nɛmɛ nɛ hlaa kaa a ye mi awi ɔ, daa nɛ ɔ, a ngɛ lakpa yee, nɛ a ngɛ ye he guɛ gbee kɛ ngɛ nyɛɛe.

¹³ Se imi lɛɛ i pee kaa otokuno; i nui nɔ́! I pee kaa mumui, i tu we munyu.

¹⁴ Ee, i pee kaa nɔ ko nɛ nui nɔ́; i pee kaa nɔ ko nɛ lilɛ kpa tsɔ nɛ́ nyɛ we munyu tumi.

¹⁵ Se i ngɔ ye hɛ ngɔ fɔ mo, Yawɛ o nɔ. Mo Yawɛ, ye Mawu; mo lɛ o maa pee ye hiami ní ɔmɛ ha mi.

¹⁶ Ye kue fami kɛkɛ ji, “Ko ha nɛ ye he nyɛli ɔmɛ nɛ a na bua jɔmi; ko ha nɛ a ye ye hɛe fɛu ngɛ ye nɔ́ nami be nɛ ɔ mi.”

¹⁷ I miɔ nɛ ma nɔ si, ejakaa daa nɛ ɔ, nɔ́ kɛkɛ i ngɛ nae.

¹⁸ I ngɛ jajee kaa i pee yayami; ye he yayami ɔmɛ ngɛ mi dɔe.

¹⁹ Ye he nyɛli ɔmɛ ngɛ kpakpataa, nɛ a he wa. Nihi nɛ nyɛɔ mi yaka gu ɔ, a he hiɛ babauu.

²⁰ Nihi nɛ ngɔɔ yayami kɛ toɔ kpakpa nane mi ɔ, jamɛatsɛmɛ ɔmɛ ba pee ye he nyɛli; ejakaa imi lɛɛ i hlaa kaa ma pee nɔ́ nɛ da.

²¹ Yawɛ, ko kua mi; ye Mawu, koo je ye he.

²² Nyɔmtsɛ, ye yi wami helɔ, ba esɔ nɛ o ba piɛ ye he.